Në fundjavë vjen dimri, në kryeqytet temperaturat nën zero

Temperaturat tipike të vjeshtës do të vijojnë të jenë prezente në vendin tonë edhe për dy ditët e ardhshme të kësaj jave.

E enjtja e premtja do të shoqërohen me temperatura që shkojnë deri në 22 gradë C, ndërsa gjatë këtyre ditëve nuk do të mungojnë reshjet e shiut.

Gjendja e motit parashikohet të përkeqësohet të shtunën, në fund të kësaj jave ku masat e ftohta arktike do të depërtojnë në vendin tonë.

Meteorologia e TVSH-së, Rezarta Xhakollari sqaron se temperaturat do të pësojnë një ulje të menjëhershme me 15 grade C, ndërsa parashikohen edhe reshje dëbore në verilindje.

Ulja e menjëhershme e temperaturave si dhe reshjet e dëborës parashikohet të sjellin probleme, duke përfshirë kryesisht ato të qarkullimit, ndaj ftohen qytetarët të tregohen të kujdesshëm.

Fillimi i muajit dhjetor parashikohet të jetë i ftohtë i shoqëruar me temperatura të ulëta dhe me ngrica.