Negociatat Shqipëri-BE, mediat greke: Përputhet me interesat tona

Greqia e ka pritur pozitivisht tekstin e qëndrimit të përbashkët europian përpara konferencës së dytë ndërqeveritare që do të mbahet sot në Luksemburg mes Tiranës dhe Bashkimit Europian.

Konferenca e ditës së sotme shënon fillimin e negociatave mbi grupin e parë të kapitujve të anëtarësimit të Shqipërisë, që kanë të bëjnë me autoritetin gjyqësor, të drejtat themelore, drejtësinë, lirinë dhe sigurinë.

Sipas burimeve diplomatike, të cituara nga mediat greke bëhet e ditur se qëndrimi i përbashkët i BE-së përputhet me interesat greke, veçanërisht në lidhje me të drejtat e pronës dhe të drejtat e minoritetit etnik grek.

“Ata theksojnë se angazhimet dhe detyrimet specifike për Tiranën do të monitorohen dhe vlerësohen sistematikisht nga Komisioni Evropian.

Teksti i marrë nga Kathimerini përmend planet e Shqipërisë për të mbrojtur dhe promovuar të drejtat e pakicave sipas detyrimeve të saj ndërkombëtare dhe standardeve evropiane”, shkruan media greke Kathimerini.

Referuar tekstit, shpjegohet se Tirana zyrtare do të të miratojë rregulloret e mbetura ekzekutive në lidhje me vetëidentifikimin dhe të drejtat e tjera, duke përfshirë përdorimin e gjuhëve të pakicave në organet administrative dhe autoritetet publike deri në fund të vitit 2024, siç përcaktohet në udhërrëfyesin e shtetit të së drejtës.

“Për më tepër, dokumenti përshkruan detyrimet e Shqipërisë për të dixhitalizuar hartat kadastrale sipas udhërrëfyesit të shtetit ligjor për të krijuar një sistem efektiv dhe transparent të regjistrimit të pronës, duke ofruar tituj të qartë dhe të sigurt pronësie deri në vitin 2030. BE-ja u bën thirrje autoriteteve shqiptare të trajtojnë çështjet me dokumente të falsifikuara siç përshkruhet në konkluzionet e zgjerimit të Këshillit të dhjetorit 2023”, thekson më tej në shkrimin e saj Kathimerini.

Theksi vihet edhe në rishikimin e legjislacionit për investimet, i konsideruar si prioritet për t’u trajtuar deri në vitin 2026.

Autoriteteve shqiptare u kërkohet të sigurojnë që shpronësimet në interes të publikut të vijnë me kompensim të drejtë për pronarët legjitimë.

Konferenca e dytë ndërqeveritare BE-Shqipëri e së martës ndan zyrtarisht Maqedoninë e Veriut nga dyshja e vendeve kandidate për anëtarësim.

Ndërkohë, ministri i jashtëm grek George Gerapetritis përfaqësoi Greqinë në Samitin e Procesit të Berlinit, një nismë e udhëhequr nga Gjermania për të promovuar perspektivën evropiane të Ballkanit Perëndimor.

Kancelari gjerman Olaf Scholz priti samitin dhe atmosfera për Shqipërinë ishte festive, në kontrast me Maqedoninë e Veriut, e cila mbetet jashtë procesit për momentin.

Gerapetritis përsëriti qëndrimin e gjatë të Greqisë, të vendosur 20 vjet më parë me Axhendën e Selanikut, për integrimin e Ballkanit Perëndimor në familjen evropiane.

Ai theksoi nevojën për respektimin e plotë të acquis evropiane, të drejtën ndërkombëtare, demokracinë dhe sundimin e ligjit.