Netanjahu flet me Bajdenin: Mos na diktoni paqen me palestinezët, as njohjen e njëanshme
Kryeministri izraelit Benjamin Netanjahu i deklaroi të enjten presidentit amerikan Xho Bajden se ai vazhdon t’i rezistojë “diktuesve ndërkombëtarë” që duan të rikthehet paqja mes Izraelit e Palestinës përmes marrëveshjeve ende të papranueshme nga Tel-Avivi.
Zyra e kryeministrit Netanjahu informoi se biseda telefonike me presidentin Bajden zgjati rreth 40 minuta. Në qendër të diskutimeve ishin pasojat pas sulmit të 7 tetorit të ndërmarrë nga grupi Hamas në Izrael, pengjet e marrë para luftës, ofensiva e planifikuar në qytetin e Rafahut dhe situata humanitare në Rripin e Gazës.
“Qëndrimet e mia mund të përmblidhen me këto dy fjali. Izraeli kategorikisht refuzon diktimet ndërkombëtare në lidhje me arritjen e një pakti të përhershëm me palestinezët. Një marrëveshje e tillë do të arrihet vetëm përmes negociatave direkte mes palëve, pa parakushte. Izraeli do vazhdojë të kundërshtojë njohjen e njëanshme të shtetit palestinez. Kjo njohje në kuadër të masakrës së 7 Tetorit do ishte shpërblim i paprecedentë për terrorizmin dhe do parandalonte çdo akord paqeje të mëvonshëm,” theksoi Netanjahu në njoftimin e tij për shtyp.
Nga ana e Shtëpisë së Bardhë, “presidenti konfirmoi zotimin e tij për të punuar pa pushim e sa më shpejt për lirimin e të gjithë pengjeve, duke e mirëkuptuar situatën e rëndë që janë duke kaluar pas 132 ditësh nën kontrollin e Hamasit. Presidenti dhe kryeministri diskutuan edhe për situatën në Gazë dhe urgjencën për të garantuar ndihma humanitare për civilët palestinezë në nevojë.“
Për sa i përket Rafahut, presidenti Bajden përsëriti se “operacioni ushtarak nuk duhet ndërmarrë pa një plan të besueshëm dhe të ekzekutueshëm, i cili siguron dhe përkrahet nga civilët e Rafahut”.
Biseda mes dy shtetarëve erdhi pas raportimeve se SHBA-ja dhe disa partnerë arabë po përgatisin një plan të detajuar për marrëveshje paqeje mes Izraelit dhe palestinezëve, ku përfshihet edhe një afat kohor për njohjen e shtetit të Palestinës.
Sulmet e ushtrisë izraelite në vendndodhjet ku pretendohet se strehohen militantë të Hamasit vijojnë të lënë pasoja në popullatën e thjeshtë palestineze. Më shumë se 28.600 civilë raportohen të vrarë që nga 7 tetori i vitit 2023 kur nisi konflikti, dhe bilanci i përgjithshëm po i afrohet shifrës 30 mijë duke përfshirë viktimat në Izrael.
Qyteti i Rafahut, që ndodhet afër kufirit të Gazës me Egjiptin, mendohet nga pala izraelite se duhet pastruar nga militantët e mbetur për të dobësuar Hamasin.
