Netanyahu: Jemi në kulmin e betejës në Gaza
Netanyahu 2.11
Kryeministri izraelit Benjamin Netanyahu thotë se trupat izraelite janë në “kulmin e betejës” në operacionin e tyre tokësor në Gaza.
“Ne jemi në kulmin e betejës. Ne kemi pasur suksese mbresëlënëse dhe kemi kaluar në periferi të qytetit të Gazës. Ne po përparojmë“, deklaroi Netanyahu.
Ndërkohë, ushtria izraelite ka bërë me dije se po rrethon qytetin e Gazës dhe po “thellon” operacionet e saj atje.
“Ushtarët tanë kanë operuar në qytetin e Gazës ditët e fundit, duke e rrethuar atë nga disa drejtime dhe duke e thelluar operacionin“, tha gjenerallejtënant Herzi Halevi.
Gati gjysma e të gjithë spitaleve në Gaza janë jashtë shërbimit për shkak të bombardimeve dhe mungesës së karburantit, sipas Ministrisë palestineze të Shëndetësisë në Ramallah. Ajo paralajmëroi të mërkurën se spitali më i madh i Gazës, Al Shifa, mund të detyrohet të ndalojë së shpejti funksionimin./ BBC
