Nga shtrëngimet e duarve te përplasjet e forta, 90 minuta debat Harris-Tramp

Ka nisur me një shtrëngim duarsh debati presidencial mes dy kandidatëve, asaj demokrate Kamala Harris dhe atij republikan Donald Tramp (Trump), për t’u mbyllur pas 90 minutash me përplasje të nxehta mes njëri-tjetrit në lidhje me 7 çështje kyçe për qytetarët amerikanë.

Debati nisi me akuza të ndërsjellëta mes Harris dhe Tramp në lidhje me mashtrimin dhe dobësinë që kanë për të marrë në dorë “timonin” e SHBA-ve.

Inflacionin, aborti, imigracioni dhe politika e jashtme ishin disa nga pikat e nxehta që solli “përplasje të forta” mes kundërshtarëve.

Ekonomia

Në fjalën e saj, zv.presidentja Kamala Harris shpalosi planin për t’u ardhur në ndihmë familjeve amerikane të cilat kanë shprehur shqetësimet e tyre në lidhje me ekonominë dhe koston e jetesës.

“Unë besoj në ambiciet, aspiratat, ëndrrat e popullit amerikan,” tha ajo.

Ajo shpalli planet e saj për të ndërtuar një “ekonomi mundësish”, duke përfshirë propozimet e saj për ta bërë strehimin më të përballueshëm dhe për të zgjeruar kreditimin e taksave për fëmijët.

Harris sulmoi gjithashtu propozimet e ish-presidentit Donald Tramp, të tilla si ofrimi i shkurtimeve të taksave për korporatat dhe argumentoi se ato do të dëmtonin familjet e klasës së mesme amerikane.

Rritja e papunësisë

Zëvendëspresidentja Kamala Harris tha se administrata e Bajdenit duhej të “pastronte rrëmujën e Donald Tramp” pas katër viteve të tij në Shtëpinë e Bardhë.

Ajo akuzoi Trampin se e la SHBA-në me “papunësinë më të keqe që nga Depresioni i Madh”, “sulmin më të keq ndaj demokracisë sonë që nga Lufta Civile” dhe “epideminë më të keqe të shëndetit publik në një shekull”.

Projekti 2025

Ish-presidenti Tramp u distancua nga Projekti 2025 pasi zv.presidentja Harris e akuzoi atë se ishte i lidhur me “planin e rrezikshëm”.

“Nuk kam asnjë lidhje me Projektin 2025. Kjo është atje jashtë. Nuk e kam lexuar. Nuk dua ta lexoj me qëllim. Nuk do ta lexoj”, tha ai.

Tramp vijoi duke thënë se njerëzit që shkruan planin e Projektit 2025 dolën me ide, “Unë mendoj se disa të mira, disa të këqija”, por se nuk ka asnjë ndryshim sepse ai nuk ka asgjë për të bërë me të.

Nga ana e saj, Harris ka sulmuar pjesë të Projektit konservator 2025 që krijon një plan për një presidencë të dytë të mundshme të Donald Trump. Dokumenti prej 920 faqesh u organizua nga Instituti Heritage Foundation dhe u zhvillua në një pjesë të konsiderueshme nga njerëz që shërbyen në administratën e Trump . Trump është distancuar publikisht nga nisma , duke i quajtur idetë e papërcaktuara të Projektit 2025 “seriozisht ekstreme”. 

Aborti dhe të drejtat riprodhuese

Harris  mori rolin kryesor  të mbrojtjes së të drejtave të abortit për administratën Bajden pasi Roe kundër Uejd (Ëade) u përmbys në qershor 2022. Janarin e kaluar, ajo filloi një ” turne të lirive riprodhuese ” në shumë shtete, duke përfshirë një ndalesë në Minesota mendohet të jetë e para nga një president ose nënkryetar amerikan në detyrë në një  klinikë aborti .

Sa i përket aksesit ndaj abortit, Harris përqafoi politika më progresive sesa Bajden në fushatën e 2020-ës, si një kandidat  që kritikonte  mbështetjen e tij të mëparshme për  Amendamentin Hyde , një masë që bllokon fondet federale që të përdoren për shumicën e aborteve. Ekspertët e politikave sugjeruan se megjithëse politikat aktuale të Harris për abortin dhe të drejtat riprodhuese mund të mos ndryshojnë ndjeshëm nga ato të Bajdenit, si rezultat i turneut të saj kombëtar dhe fokusit të saj në  shëndetin e nënës , ajo mund të jetë një lajmëtar më i fortë.

Ndërsa ish-presidenti Tramp mbrojti vendimin e tij për të mbështetur ndalimin e abortit gjashtë-javor që do të jetë në fletëvotimin në shtetin e tij të Floridës, një ndryshim nga qëndrimi i tij i mëparshëm për masën.

Ai tha se “demokratët janë radikalë” në politikat e tyre të abortit, megjithëse ai ka thënë se beson se aborti duhet të jetë një çështje shtetërore.

Atentati ndaj Tramp

Atentati ndaj Donad Tramp ka qenë një tjetër pikë e “shfrytëzuar” nga kandidati republikan, i cili u shpreh se “Me siguri kam marrë një plumb në kokë për shkak të gjërave që thonë për mua. Ata flasin që unë jam kërcënim për demokracinë, janë kërcënim për demokracinë”. Deklarata e tij erdhi si një kundërpërgjigje ndaj Harris e cila paralajmëroi amerikanët se çfarë do të thoshte për vendin një mandat i dytë për Tramp dhe argumentoi se u takon atyre ta “ndalojnë” atë.

Hamasi dhe Izraeli

Pyetur për Hamasin, luftën në Izrael dhe pengjet, Harris deklaroi se SHBA kërkon marrëveshje armëpushimi dhe lirimi pengjes.

“Ne duam një marrëveshje armëpushimi dhe një marrëveshje për lirimin e pengjeve. Ne duam një zgjidhje me dy shtete që çon në rindërtimin e Gazës”, tha ajo.

Nga ana e tij Tramp u shpreh se po të kishte qenë ai President,  Vladimir Putin nuk do të kishte hyrë kurrë në Ukrainë. Më tej, lidhur me luftë në Izrael,  ish-presidenti amerikan tha se nëse Harris zgjidhet si Presidente, Izraeli nuk do të ekzistojë për 2 vjet.

“Harris e urrente Netanyahun. Nëse ajo bëhet president, Izraeli nuk do të ekzistojë për dy vjet. Ajo gjithashtu i urren arabët”, tha ai.

Harris iu kundërpërgjigj se Trump “dëshiron të bëhet diktator një ditë”.

“Ai dihet se ka thënë se kur Rusia hyri në Ukrainë, ishte e shkëlqyer. Dihet që ai ka shkëmbyer letra me Kim Jong Un dhe dihet absolutisht se këta diktatorë dhe perandorë duan që ju të bëheni sërish president sepse është kaq e qartë që mund t’ju ​​manipulojnë me lajka dhe favore”, tha kandidatja demokrat.