Nikolla: Antifashizmi dhe liria, në themelet e Shqipërisë evropiane

Kryetarja e Kuvendit, Lindita Nikolla ka vlerësuar se 29 Nëntorit, Dita e Çlirimit të Shqipërisë, është dita e kurorëzimit të Luftës Antifashiste Nacional-Çlirimtare të popullit shqiptar.

Zonja Nikolla tha se “Çlirimi i Shqipërisë është një vepër monumentale e partizanëve shqiptarë, të mbështetur nga populli, të cilët në Luftën e Dytë Botërore e vendosën Shqipërinë në anën e duhur të historisë”.

Kryeparlamentarja nënvizon se lufta e ashpër kundër pushtuesve në malet, luginat, fshatrat, qytetet, në çdo pëllëmbë të territorit të Shqipërisë është një sakrificë e madhe, por edhe një frymëzim i madh.

“Antifashizmi, liria dhe vlerat demokratike qëndrojnë në themelet e Shqipërisë evropiane, një anëtare e denjë e NATO-s, kontribuese e paqes, sigurisë dhe stabilitetit në Evropë e në botë dhe promotore e zhvillimit, integrimit dhe bashkëpunimit në rajon”, tha zonja  Nikolla.

Kryetarja e Kuvendit shprehet se i bashkohet sot mirënjohjes e nderimit për dëshmorët, veteranët e Luftës, çlirimtarët e Shqipërisë.