Nis nesër muaji i shenjtë i Ramazanit, kreu i KMSH mesazh urimi për besimtarët
Fillon nesër (1 mars) muaji i shenjtë i Ramazanit për të gjithë besimtarët myslimanë. Kryetari i Komunitetit Mysliman të Shqipërisë, Bujar Spahiu, ka uruar të gjithë besimtarët për një muaj Ramazani sa më të paqtë e të begatë.
Përmes një mesazhi në faqen zyrtare të KMSH, Spahiu i ka bërë thirrje të gjithë besimtarëve që në këtë muaj të shenjtë, të forcojnë lidhjet jo vetëm me të afërmit e familjarët, por edhe me shoqërinë, duke e bërë kështu komunitetin më të bashkuar.
“Nesër, më 1 mars, fillon muaji i shenjtë i Ramazanit, një muaj i bekuar reflektimi, përkushtimi dhe pastrimi shpirtëror.
Me zemrën plot mirënjohje ndaj Krijuesit të gjithësisë, i Cili na mundësoi ta arrijmë sërish këtë muaj të shenjtë, ju përcjell urimet më të përzemërta për një agjërim të lehtë dhe të pranuar, si në emrin tim personal, po ashtu edhe në emër të institucionit që unë drejtoj.
Ky muaj na fton të ndalemi dhe të reflektojmë mbi mirësitë e panumërta që Zoti na ka dhuruar. Është një mundësi e artë për të shprehur falënderim ndaj Tij, për të kultivuar durimin, për të rivitalizuar lidhjen tonë me Kuranin Famëlartë dhe për të rrezatuar dashuri ndaj të tjerëve.
Ramazani është gjithashtu muaji i solidaritetit dhe i vëllazërisë. Ai na kujton përgjegjësinë tonë ndaj atyre që kanë nevojë për ndihmën tonë dhe na fton të tregojmë bujari, dhembshuri dhe kujdes për më të dobëtit.
Në këtë muaj të shenjtë, le të forcojmë jo vetëm lidhjet tona me familjen dhe të afërmit, por edhe me shoqërinë në tërësi, duke e bërë komunitetin tonë më të ndjeshëm dhe më të bashkuar. Allahu (xh.sh.) thotë në Kur’an: “O besimtarë! Ju është urdhëruar agjërimi, ashtu siç u ishte urdhëruar atyre para jush, që të mund të ruheni nga të këqijat.””, thuhet në mesazh.
Spahiu thekson se agjërimi nuk është vetëm një sakrifixë fizike, por një proces i thellë shpirtëror që synon ndërtimin e një personaliteti të qendrueshëm, të devotshëm dhe të mbushur me vlera morale të larta.
“Të dashur besimtarë shqipfolës, kudo që jetoni e punoni, uroj që ky muaj i shenjtë të sjellë begati, paqe dhe harmoni në familjet tona dhe në mbarë shoqërinë.
Lusim Allahun Fuqiplotë që të na japë forcë, përkushtim dhe sinqeritet për ta jetuar këtë muaj në mënyrën më të mirë të mundshme, duke përfituar nga mirësitë dhe begatitë e tij të shumta. Gëzuar muajin e bekuar të Ramazanit!”, thuhet më tej në mesazh.
Muaji i Ramazanit fillon më 1 mars dhe përfundon më 29 mars, ndërsa mëngjesi i datës 30 mars shënon festën e Fitër Bajramit, e cila simbolizon mbylljen e këtij muaji të shenjtë për këtë vit.
