Nis viti i ri akademik/ 20 mijë të regjistruar, rritet interesi për degët në bujqësi

Procesi mësimor nis këtë të hënë (2 tetor) për të gjithë studentët. Deri tani rezultojnë të regjistruar në Institucionet e Arsimit të Lartë në vend mbi 20 mijë të rinj. Ky numër pothuajse është i njëjtë me atë të një viti më parë dhe gjithashtu preferencat për programet e studimit kanë mbetur të njëjtat.

Më të kërkuarat edhe për këtë vit rezultojnë degët që të sigurojnë një vend pune si: Mjekësia e Përgjithshme, Arkitektura dhe Inxhinieritë.

Këtë vit është vënë re një rritje e interesit për programet prioritare të studimit që ofron Universiteti Bujqësor.

Në këtë Universitet vihet re një tejkalim i numrit minimal të studentëve për një grup. Vetëm 2 programe në këtë universitet, Agrobiologji dhe Inxhinieri Agrare, rezultojnë me një numër të kufizuar studentësh.

Regjistrimet do të vijojnë deri në fund të muajit tetor për të gjithë ata të rinj që nuk e kanë bërë ende zgjedhjen e tyre.