Nisin koncertet e verës, nga data 4 korrik deri më 23 gusht do të këndojnë në shesh artistë të ndryshëm

Nga mbrëmja e së enjtes shkodranët do të festojnë në sheshin e shatërvanit në Fan Zone me disa nga artistët më në zë të skenës shqiptare të muzikës. Koncertet e verës, tashmë një traditë disavjeçare rikthehen sërish për publikun në shesh.

Duke nisur nga mbrëmja e 4 korrikut , ku në skenën e improvizuar në sheshin e shatërvanit do të ngjiten vëllezërit korçarë Endri dhe Stefi Prifti me këngët e qytetit të serenatave. Programi i koncerteve të verës do të vijojë në datën 7 korrik me këngëtarin Sardi Strugaj dhe 8 korrik mjeshtrin e baladave Redon Makashin.

Këngëtarë si Elton Deda, Aleksandër Gjoka, Altin Goci, Marsela Çibukaj, Vesa Luma etj. pritet të mbajnë ndezur atmosferën e koncerteve të verës që do të përmbyllen më 23 gusht ku pjesë e koncertit të fundit veror do të jetë një nga artistet që ka përfaqësuar Shqipërinë në Eurovision, Anxhela Peristeri.

Koncertet e verës pritet t’i sjellin fundjavave nuanca festive gjatë gjithë verës në qytetin e Shkodrës. Artistë të ndryshëm nga e gjithë Shqipëria, por edhe Kosova do të jenë prezentë për të zbukuruar fundjavat me turistë vendas dhe të huaj.