Nisma në nderim të 4 legjendave të Vllaznisë – Tribunat e stadiumit “Loro Boriçi” me emrat e yjeve të futbollit shkodran

Pas deklaratës së Presidentit të Vllaznisë, Alban Xhaferi, Klubi i Futbollit Vllaznia i është drejtuar me një shkresë zyrtare Këshillit Bashkiak Shkodër për emërtimin e katër tribunave të stadiumit “Loro Boriçi” me emrat e katër figurave të mëdha të futbollit shkodran dhe shqiptar, konkretisht:

Ramazan Rragami, Paulin Ndoja, Medin Zhega dhe Sabah Bizi.

Kjo kërkesë është një vlerësim për kontributin e jashtëzakonshëm që ata dhanë për klubin e Vllaznisë dhe futbollin shqiptar në tërësi, theksohet në kërkesën e KF Vllaznia.

Ndërkohë, nuk ka vonuar reagimi i kryebashkiakut të Shkodrës, Benet Beci, i cili përmes një postimi në Facebook thekson se

“Propozimi i Klubit të Futbollit Vllaznia dhe i tifozëve të shumtë shkodranë, jo vetëm që ka mbështetjen e tij personale, por beson se ka mbështetje nga e gjithë Shkodra për të realizuar emërtimin e këtyre emrave të mëdhenj të futbollit shkodran dhe shqiptar në tribunat e stadiumit ‘Loro Boriçi’.”

Ndërkohë, vetëm pak ditë më parë, u nda nga jeta  Sabah Bizi, një prej katër legjendave të Vllaznisë, i cili dha një kontribut të jashtëzakonshëm në futbollin shkodran dhe atë shqiptar.