Notre-Dame de Paris rihap dyert për turistët pas pesë vitesh
Pas më shumë se pesë vitesh pasi pësoi dëme të mëdha, katedralja Notre Dame e Parisit hap sërish sot (7 dhjetor) dyert.
Notre-Dame u dëmtua rëndë nga një zjarr që shkatërroi majën dhe çatinë e saj dhe pothuajse shkaktoi shembjen e plotë të kësaj kryevepre të artit gotik.
Katedralja mesjetare 860-vjeçare, një simbol i Francës dhe Parisit, është restauruar me kujdes, me një majë dhe çati të re, duke iu kthyer lavdisë së mëparshme dhe dekorimet e saj të bardha dhe ngjyrë ari shkëlqejnë sot më shumë se kurrë.
Në ceremoni do të jenë të pranishëm presidenti i zgjedhur i SHBA-së, Donald Trump, Princi i Britanisë William dhe dhjetëra krerë shtetesh dhe qeverish, duke përfshirë presidentin e Ukrainës Volodymyr Zelensky.
Mijëra mjeshtër ekspertë, nga zdrukthëtarë dhe gurgdhendës deri tek artistët e xhamit, kanë punuar pa ndërprerje gjatë pesë viteve të fundit, duke përdorur metoda të lashta për të restauruar, riparuar ose zëvendësuar atë që ishte shkatërruar ose dëmtuar.
Guri i themelit të katedrales u vendos në vitin 1163 dhe ndërtimi i saj vazhdoi në shekullin pasardhës, ndërsa u restaurua dhe u shtua në shekujt XVII dhe XVIII.
Victor Hugo ndihmoi për ta bërë katedralen një simbol të Parisit dhe Francës kur e përdori atë në 1831 si mjedis për romanin e tij Notre Dame. Kuazimodo, personazhi qendror i romanit, është bërë në filma të Hollivudit, në një film të animuar të Disney-t dhe në një muzikal.
Aq shumë para janë mbledhur për restaurimin e tij nga e gjithë bota, më shumë se 840 milionë euro, saqë kanë mbetur fonde për të investuar më tej në ndërtesë. Kisha Katolike tani pret që katedralja të mirëpresë rreth 15 milionë vizitorë në vit.
