Opozita refuzon Vuçiqin për kryeministrin, Kamberi: Të ndryshojë qasja ndaj shqiptarëve

Deputeti shqiptar në Serbi, Shaip Kamberi, deklaroi të hënën (26 shkurt) se lista që ai përfaqëson nuk do të bëhet pjesë e qeverisë së re serbe.

Kamberi ishte i pari që takoi presidentin Aleksandar Vuçiq (o. Vucic), në kuadër të procesit konsultativ për të caktuar kryeministrin e radhës pas zgjedhjeve të dhjetorit.

Sipas Kamberit, në takim ai i kërkoi presidentit Vuçiq që Serbia të ndryshojë qasje ndaj shqiptarëve të Luginës së Preshevës dhe të zbatojë “planin 7-pikësh”.

“Ripërsëritëm qëndrimin tonë të përbashkët se nuk jemi të interesuar për asnjë pozitë në nivel qendror, por që konsiderojmë se avancimi i të drejtave të shqiptarëve është interesi jonë i vetëm dhe ai duhet të fillojë nga institucionet shtetërore të nivelit lokal e rajonal. Qasja e shtetit ndaj shqiptarëve duhet të ndryshojë. Me presidentin Vuçiq diskutuam edhe për nevojën e privatizimit të Banjës së Bujanocit, rritjes së investimeve në nivel lokal dhe ndaljen e gjuhës së urrejtjes ndaj shqiptarëve,” reagoi z. Kamberi me një postim në rrjetet sociale.

Presidenti Vuçiq njoftoi javën e kaluar se do të fillojë konsultimet me këdo që dëshiron, ndërsa opozita e ka refuzuar thirrjen, pasi kundërshton edhe rezultatet e zgjedhjeve me pretendimin se janë vjedhur. Parlamenti Europian gjithashtu ka pranuar një sërë abuzimesh gjatë procesit të votimit dhe nëpërmjet një rezolute ka kërkuar që pretendimet të hetohen.

Seanca konstitutive e parlamentit serb u ndërpre më 6 shkurt sapo u konfirmuan mandatet e deputetëve, por kryetari i Kuvendit dhe organet e punës ende nuk janë zgjedhur.