OSBE në Kosovë: Të vihen para drejtësisë ata që përdhosën varrezat serbe në Rahovec

Misioni i OSBE-së në Kosovë shprehu keqardhjen për përdhosjen e varrezave ortodokse serbe në Rahovec dhe u bëri thirrje institucioneve përgjegjëse që të hetojnë rastin dhe t’i nxjerrin autorët para drejtësisë.

“Me pikëllim dëgjova për përdhosjen edhe një herë të varrezave ortodokse serbe në Rahovec/Orahovac më 18 dhjetor. U bëjmë thirrje institucioneve përgjegjëse që të hetojnë dhe nxjerrin autorët para drejtësisë si dhe të marrin masa për të parandaluar çdo akt vandalizmi në të ardhmen“, njoftoi Misioni i OSBE-së në rrjetin social X (Twitter).

Dy ditë më parë banorë të zonës konstatuan se në  varrezat lokale ortodokse në Rahovec u thyen të paktën pesë kryqe druri.

Rasti i fundit i përdhosjes së varreve ortodokse u shënua në varrezat serbe të Rahovecit më 28 gusht.