OSBE paraqiti raportin për Shqipërinë, reagon BE dhe SHBA. Kryefjalë, drejtësia

Përparimi në reformën në drejtësi dhe nevoja për progres të mëtejshëm në këtë drejtim është kryefjala në përgjigjet e Bashkimit Evropian dhe Shteteve të Bashkuara të Amerikës, ndaj raportit të OSB-së për vendin tonë. Ambasadori i OSBE në Shqipëri, Bruce Berton paraqiti sot (21 shtator) raportin në Këshillin e Përhershëm, ndërsa BE përshëndet edhe zgjatjen e mandatit kushtetues të organeve të vettingut, teksa kërkon që procesi të përmbyllet në kohën më të shkurtër të mundshme.

“Sigurimi i arritjeve solide dhe të pakthyeshme, duke përfshirë edhe fushën e sundimit të ligjit, mbetet vendimtar për përmbushjen e kërkesave të anëtarësimit në BE. Ne mirëpresim që procesi i verifikimit ka vazhduar të përparojë në mënyrë të qëndrueshme dhe ka prodhuar rezultate të prekshme. Ne mirëpresim gjithashtu zgjatjen e mandatit kushtetues të organeve të vettingut dhe inkurajojmë autoritetet të sigurojnë përfundimin e rregullt të procesi në kohën më të shkurtër të mundshme. Ne mirëpresim gjithashtu mbështetjen e Prezencës për përpjekjet kundër korrupsionit, në veçanti fokusin në prokurimin publik. Zbatimi i vendimeve të formës së prerë të gjykatës mbetet thelbësor”, thekson BE.

Shtetet e Bashkuara, teksa vlerësojnë punën e bërë nga OSBE në Shqipëri, në përgjigjen e tyre shprehen se mbështesin forcimin e sundimit të ligjit dhe sistemin e drejtësisë.

“Ne mbështesim plotësisht mandatin e zyrës suaj për të forcuar sundimin e ligjit dhe sistemin e drejtësisë, për të avancuar qeverisjen e mirë në të gjitha nivelet, për të luftuar kërcënimet transnacionale, për të kontribuar në një mjedis më të shëndetshëm mediatik, për të promovuar dhe të angazhojë shoqërinë civile, si dhe barazinë gjinore në Shqipëri”, thuhet në përgjigjen e SHBA.

Bashkimi Evropian ka theksuar edhe njëherë angazhimin e Unionit ndaj zgjerimit.

“BE shpreh angazhimin e saj ndaj perspektivës së anëtarësimit evropian të Ballkanit Perëndimor, bazuar në reforma të besueshme nga partnerët, kushtëzimin e drejtë dhe rigoroz dhe parimin e meritave të veta”, thuhet mes të tjerash në përgjigje.

Ndalur te liria e medias, si BE ashtu edhe SHBA kërkojnë përparim më të prekshëm në këtë drejtim.

“Ne mirëpresim rolin aktiv të Prezencës në promovimin e lirisë së medias. Ndërsa vërejmë se Shqipëria e përmirësoi lirinë e shtypit sipas Indeksit të Lirisë së Medias 2023, kujtojmë rëndësinë e lirisë dhe pluralizmit të medias, të garantimit të pavarësisë dhe paanësisë së medias, si dhe sigurisë së gazetarëve. Ne vazhdojmë t’i bëjmë thirrje Shqipërisë që të bëjë përparim të prekshëm në lirinë e shprehjes”, thuhet në përgjigjen e BE.

“Shtetet e Bashkuara lavdërojnë punën tuaj për të promovuar lirinë e shprehjes, duke përfshirë edhe anëtarët e medias, në Shqipëri. E kuptoj që keni organizuar një seminar të suksesshëm në shkurt mbi rëndësinë e komunikimit ndërmjet institucioneve publike dhe medias. Më pas ju demonstruat mbështetje për talentet e rinj në maj duke rivizituar Platformën Mediatike të Tiranës në Konferencën Mediatike të Evropës Juglindore. Udhëheqja e zyrës suaj ishte një kontribut i rëndësishëm në promovimin e rolit të gazetarëve të rinj në të ardhmen e medias”, thuhet në reagimin e SHBA.

Po ashtu, SHBA shpreh mbështetjen me fonde ekstrabuxhetore për përpjekjet e OSBE për të luftuar trafikimin e qenieve njerëzore duke trajnuar prokurorët, gjyqtarët dhe oficerët e ardhshëm të policisë.

“Mbështetja e programeve të OSBE-së kundër trafikimit çon përpara qëllimet tona të përbashkëta për të rritur ndërgjegjësimin e viktimave të mundshme dhe për të ndihmuar qeveritë të parandalojnë dhe parandalojnë trafikimin. Ne jemi gjithashtu krenarë që kontribuojmë në programin e zyrës për të trajnuar dhe mbështetur gjyqtarët dhe stafin e Gjykatës Kushtetuese të Shqipërisë për mbrojtjen e të drejtave të njeriut. Ne presim suksesin e vazhdueshëm të këtyre projekteve dhe mirëpresim mendimet tuaja për programe të tjera të lidhura që mund të çojnë përpara qëllimet tuaja dhe ato të misionit”, shprehet SHBA.