Osmani-Hovenier takim për dinarin, diskutohen propozimet për tranzicionin e zbatimit të rregullores së BQK
Presidentja e Kosovës Vjosa Osmani dhe ambasadori amerikan Xhefri Hovenier (Jeff Hovenia) gjatë një takimi të enjten (22 shkurt) në Prishtinë kanë biseduar rreth propozimeve, që siç thuhet në njoftimin e Presidencës, ofrojnë një zgjidhje të qëndrueshme për planin e trazicionit lidhur me zbatimin e rregullores së Bankës Qendrore të Kosovës, e cila nga 1 shkurti ka ndaluar qarkullimin e dinarit serb.
Megjithatë nuk u bë e ditur se për çfarë propozimesh u bisedua.
“Diskutime për aspekte të ndryshme të bashkëpunimit bilateral. Presidentja Osmani ritheksoi mirënjohjen e thellë për mbështetjen e përhershme të Shteteve të Bashkuara të Amerikës për sovranitetin, kushtetueshmërinë dhe integritetin territorial të Kosovës”, thuhet në njoftimin e Presidencës.
Në mes tjerash, Presidenca thotë se në takim u diskutua edhe për bashkëpunimin për agjendën ndërkombëtare në muajt në vijim, por edhe bashkëpunimin në fushën e mbrojtjes.
Çështja e ndalimit të dinarit serb ka tendosur marrëdhëniet mes Kosovës dhe Shteteve të Bashkuara, pasi Uashingtoni i ka kërkuar Qeverisë, që të shtyjë zbatimin e rregullores së Bankës Qendrore.
