Osmani në Bruksel: Serbia po planifikon sulme të reja në Kosovë

Presidentja e Kosovës, Vjosa Osmani, ka deklaruar sot para mediave në Bruksel, në prag të Samitit BE-Ballkani Perëndimor, se ka informacione rreth planeve të sulmeve të reja të Serbisë në Kosovë.

Sipas RTK-së, Osmani ka shprehur shqetësimin dhe ka theksuar rëndësinë që këto alarme të merren seriozisht.

Presidentja e Kosovës theksoi se është e domosdoshme që të merren masa për të parandaluar destabilizimin e rajonit nga sulmet e mundshme të Serbisë.

“Do t’i informoj të gjithë liderët evropianë sot për informatat që institucionet tona të sigurisë së bashku me partnerët i kanë mbledhur në këtë drejtim, sepse këto janë alarme të cilat të gjithë ne duhet t’i marrim shumë seriozisht dhe të veprojmë si preventivë në mënyrë që Serbia mos ta destabilizojë më rajonin tonë. Për fat të keq Serbia akoma udhëhiqet nga njerëz që dëshirojnë ta kthejnë prapa rajonin tonë në vitet e 90-ta. Ne nuk duhet të lejojmë që një logjikë e tillë të triumfojë, prandaj po punojmë me partnerët tanë në BE në mënyrë që të rritet siguria në Kosovë dhe sidomos aspekti i sigurisë rreth kufirit me Serbinë dhe e dyta që të hiqen masat ndaj Kosovës, është e domosdoshme që të ketë masa ndaj Serbisë për aktin e agresionit që është kryer më 24 shtator. Për fat të keq deri më tani nuk ka pasur asnjë veprim dhe nëse vazhdohet pa asnjë veprim ose masë ndaj Serbia, ajo do ta marrë këtë si një lloj nxitjeje”, ka theksuar Osmani.