“Paketa e Maleve” shkon në Kuvend, Zhupa akuza qeverisë: Po përdorni grantet për të blerë vota
Deputetja demokrate Ina Zhupa ka akuzuar Partinë Socialiste për përdorimin e projektligjit për “Paketën e Maleve” si një mjet elektoral. Ajo ka thënë se ky projektligj është futur në rendin e ditës së Kuvendit për të shpërndarë grante dhe favore, duke synuar të marrë vota për PS në zgjedhjet e 11 majit.
Zhupa e ka cilësuar këtë si një shkelje të Kodit Zgjedhor, që ndalon shpërndarjen e granteve në periudhën zgjedhore, dhe ka kërkuar heqjen e tij nga kalendari i punës.
“Ne jemi mbledhur më 20 Janar dhe Paketa e Maleve nuk ka rezultuar në projekt-kalendar. Tani na del që e paskan depozituar në datën 10 Janar. Keni futur për në seancë plenare sepse po e përdorni Kuvendin si aset elektoral dhe po bëni ligjvënie elektorale me qellim shpërndarjen e favoreve dhe parasë publike për të marr votën për Partinë Socialiste. Ju parashikoni të jepni grante për të marr vota. Kodi Zgjedhor e ndalon këtë shpërndarje grantesh në kohë zgjedhore, por ju nuk pyesni. Ndërkohë ligjet e ministrave tuaj i kaloni në korsinë e shpejtë, ndërsa nismat e deputetëve kanë me vite që nuk shqyrtohen. Hiqeni urgjentisht nga kalendari sepse jeni në shkelje të Kodit Zgjedhor” është shprehur Zhupa.
Projektligji për “Paketën e Maleve” synon të mbështesë zhvillimin ekonomik të zonave malore përmes investimeve nga sektorin privat. Investitorët mund të blejnë truall shtetëror për vetëm 1 euro, por certifikata e pronësisë do të merret vetëm pas përfundimit të projektit.
500 subjektet e para do të përfitojnë nga disa përjashtime tatimore për 10 vjet. Qëllimi i ligjit është të tërheqë investime, të mbrojë burimet natyrore, të krijojë vende pune dhe të përmirësojë kushte jetese në këto zona malore.
