Paralajmërimi i Trump mbi tarifat, reagojnë liderët e BE: Të gatshëm të reagojmë

Udhëheqësit e Bashkimit Evropian kanë reaguar pas kërcënimeve tarifore të presidentit amerikan Donald Trump kundër bllokut.

Udhëheqësit e BE-së kanë sinjalizuar se blloku do të ishte i përgatitur të hakmerrej kundër SHBA-së nëse Donald Trump do të zbatonte kërcënimet e tij për të vendosur tarifa ndaj mallrave evropiane.

Duke folur përpara takimit të tyre jozyrtar në Bruksel, ata bënë thirrje për qetësi dhe theksuan vlerën e bashkëpunimit BE-SHBA, ndërsa treguan se nuk do të fshiheshin nga përgjigjja me tarifa.

Shefja e politikës së jashtme të BE-së Kaja Kallas tha se blloku po “dëgjonte me kujdes” komentet e Trump dhe “po përgatitej” për t’u përgjigjur nëse do të ishte e nevojshme.

Megjithatë, ajo theksoi se “nuk ka fitues në luftërat tregtare” dhe vuri në dukje se Kina do të ishte e vetmja përfituese e këtij skenari.

Presidenti francez Emmanuel Macron tha se nëse Evropa “sulmohet në aspektin e tregtisë … [ajo] do të duhet të ngrihet në këmbë dhe për këtë arsye të reagojë”.

Kryeministri polak Donald Tusk tha se BE duhet të bëjë gjithçka që mundet për të shmangur “luftërat tarifore krejtësisht të panevojshme dhe budallaqe”, duke shtuar se do të ishte një “paradoks mizor” nëse blloku do të detyrohej në një luftë tregtare me një aleat të gjatë.

Kryeministrja daneze Mette Frederiksen – e cila tashmë është përfshirë në një krizë të veçantë me Trump për të ardhmen e Grenlandës – tha se “nuk do të mbështeste kurrë aleatët luftarakë, nëse SHBA vendos tarifa të ashpra ndaj Evropës, ne kemi nevojë për një përgjigje kolektive dhe të fuqishme”.

Nga ana e tij, kryeministri i Luksemburgut, Luc Frieden nënvizoi se përgjigja ndaj Trump është kundërpërgjia me tarifa.

“Përgjigja ndaj tarifave është të përgjigjesh me të njëjtin veprim, por kjo nuk duhet të errësojë diskutimet e sotme mbi mbrojtjen”, tha ai.

Disa liderë të tjerë patën tone më pajtuese kundrejt deklaratave të Trump. Kancelari gjerman Olaf Scholz tha se çdo tarifë do të ishte “e keqe për SHBA-në dhe e keqe për Evropën” dhe theksoi nevojën për bashkëpunim për të zgjidhur këtë situatë.

Në të njëjtën linjë qëndroi edhe kryeministri finlandez Petteri Orpo i cili tha se “duhet të negociojmë me Trump. Unë nuk do të filloj një luftë, unë dua të filloj negociatat”.