Parlamenti Evropian konfirmon Ursula von der Leyen si Presidente e Komisionit Evropian

Parlamenti Europian zgjedh presidenten Ursula von der Leyen për një mandat të dytë në Komisionin Europian

Ursula von der Leyen, një politikane gjermane e qendrës së djathtë, ka fituar votën e Parlamentit Evropian për të qëndruar si presidente e Komisionit Evropian për një mandat të dytë pesëvjeçar. 401 eurodeputetë votuan pro, 284 kundër dhe 15 abstenuan.

Von der Leyen kryesoi Komisionin përmes dy krizave të mëdha, pandemisë Covid dhe pushtimit të Ukrainës nga Rusia. Konfirmimi i saj për një mandat tjetër si shefe e Komisionit do të sjellë lehtësim për shumë kryeqytete të BE-së, të cilat kanë kërkuar vazhdimësi në Bruksel, mes pasigurisë politike në disa vende anëtare, luftës së vazhdueshme në Ukrainë dhe shqetësimeve për ndikimin e mundshëm të zgjedhjeve të ardhshme në SHBA.

Por von der Leyen gjithashtu është kritikuar nga pjesë të spektrit politik. Disa politikanë argumentuan se angazhimi i saj ndaj marrëveshjes së gjelbër të bllokut dhe për mbrojtjen e standardeve të sundimit të ligjit ka qenë i paqëndrueshëm dhe se marrëdhëniet e saj me vendet e treta mbi politikën e migracionit nuk ofronin garanci të mjaftueshme për të drejtat e njeriut.

Të tjerët, veçanërisht në të djathtën ekstreme, e shohin von der Leyen si tepër centriste, duke e kritikuar atë për marrëveshjen e gjelbër dhe politikat e tjera thelbësore.

Në Bruksel, von der Leyen, nënë e shtatë fëmijëve, e cila me profesion është mjeke, është përballur me kritika. Ajo është përballur gjithashtu me ankesa për çështjet e transparencës, me vendimin e gjykatës së përgjithshme të BE-së këtë javë se Komisioni fshehu në mënyrë të paligjshme detajet e kontratave të prokurimit të vaksinës Covid.

Përpara votimit të sotëm, von der Leyen u takua me eurodeputetë nga i gjithë spektri politik në një përpjekje për të mbledhur mbështetje përtej tre partive centriste që e mbështetën atë në të kaluarën.

Ajo ofroi një listë të gjatë premtimesh politikash të përshtatura për t’u bërë thirrje zonave të ndryshme elektorale. Këto përfshinin një plan për të reduktuar barrën burokratike për bizneset e vogla dhe një propozim për një “marrëveshje të re të pastër industriale” për të kanalizuar investimet në dekarbonizimin e prodhimit dhe teknologjinë e gjelbër./The Guardian