Pekini regjistron shifra rekord të të ftohtit

Pekini ka përjetuar dhjetorin e tij më të ftohtë që prej vitit 1951. Ndërsa temperaturat në qytet kanë rënë shpesh nën -10C këtë muaj.

Kina është goditur nga disa valë të motit jashtëzakonisht të ftohtë tashmë këtë dimër. Një observator i motit në Pekin kohët e fundit regjistroi më shumë se 300 orë temperatura nën zero në më pak se dy javë, sipas agjencisë së lajmeve China Daily të mbështetur nga shteti.

I ftohti ka prekur provincat në të gjithë Kinën, me shkollat që në disa zona janë detyruar të mbyllen dhe shërbimet e transportit përballen me vështirësi.

Moti i ftohtë i vazhdueshëm ka vënë nën tendosje furnizimet me energji në provincën Henan, ku disa kaldaja për ngrohje janë prishur.

Ndërkohë, pjesë të Japonisë veriore kanë parë reshje të mëdha dëbore – shumë më tepër se sasia e zakonshme për këtë periudhë të vitit.

Paralajmërime për borë të dendur janë lëshuar për disa zona gjatë ditëve të fundit, me rreth një metër borë që ka rënë në prefekturat Gifu dhe Hokkaido.

Ka pasur një luhatje ekstreme të temperaturave në Korenë e Jugut javët e fundit – duke filluar nga 16C në nën -12C, sipas Administratës Koreane Meteorologjike (KMA). Nuk është e qartë se si njerëzit po përballen me motin ekstrem në Korenë e Veriut fqinje.

Një arsye e mundshme e dhënë për goditjen e ftohtë është një dobësim në Vorbullën Polare – një hapësirë ajri i ftohtë që normalisht qëndron rreth Arktikut – duke lejuar që ajri të lëvizë më në jug se normalja.

Megjithatë, ka debat midis shkencëtarëve se çfarë roli luan ndryshimi i klimës në këtë.