Përmbytjet me dhjetëra të vdekur në Spanjë, Rama: E trishtueshme, jemi të gatshëm t’ju ndihmojmë

Kryeministri Edi Rama i ka shprehur ngushëllimet familjarëve të viktimave nga përmbytjet që goditën Spanjën jugore dhe atë lindore. Teksa shpreh solidaritetin me popullin spanjoll për këtë fatkeqësi natyrore që goditi qytetet e Valencias, Andaluzisë dhe Murcias, kryeministri Edi Rama shpreh gatishmërinë e Shqipërisë për të ndihmuar.

“Thellësisht e trishtueshme të dëgjoja për përmbytjet e rënda që po prekin zonat e Valencias, Andaluzisë dhe Murcis në Spanjë, katastrofa më e rëndë natyrore, që ka shkaktuar të paktën 51 viktima. Ngushëllimet e mia shkojnë për familjet e viktimave. Shpreh solidaritetin tim për popullin dhe Qeverinë e Spanjës! Uroj që të gjitha komunitetet e prekura të rikuperohen sa më shpejt, ne jemi të gatshëm të ndihmojmë”, shkruan Rama në platformën X.

Në vetëm 12 orë Spanja jugore dhe lindore u godit nga stuhi të forta dhe reshje të dendura shiu duke sjellë përmbytjeve dhe shkatërrime të mëdha në Valencia dhe qytete rreth saj.  Si pasojë e përmbytjeve të paktën 51 persona kanë humbur jetën, ndërsa zonat e prekura ka shpallur gjendjen e emergjencës.