Përmbytjet në Kinë/ Pekini forcon argjinaturat e lumenjve. Shtohen operacionet e…

Përmbytjet në Kinë/ Pekini forcon argjinaturat e lumenjve. Shtohen operacionet e shpëtimit

Tajfuni “Doksuri”, i cili solli me vete shira të rrëmbyeshme duke goditur Kinën Veriore dhe rajonin midis Lumit të Verdhë e lumit Huaihe prej një jave, ka shkaktuar përmbytje në shumë zona në provincën Hebei dhe në pjesën jugperëndimore të Pekinit.

Në kryeqytetin kinez, sasia e reshjeve shënoi rekordin e 140 viteve të fundit, sipas Administratës Meteorologjike atje. Bashkia e qytetit të Pekinit njoftoi se janë regjistruar 11 humbje jetësh nga përmbytjet dhe 27 persona rezultojnë të humbur.

Përmbytjet që i kthyen rrugët në lumenj, rrëmbyen automjete, sollën rrëshqitje dheu dhe shkaktuan ndërprerjen e furnizimit me ujë e energji, si edhe të sinjaleve të komunikimit. Ndërkohë, në provincën Hebei, 9 veta humbën jetën dhe 6 të tjerë janë shpallur të humbur.

Ndërsa, në Zhuozhou, 133 913 njerëz dhe mbi 65 hektarë tokë bujqësore u prekën nga përmbytjet. Lumi Haihe me 13 degët e tij rrezikojnë të dalin nga shtrati dhe Komanda e Kontrollit të Përmbytjeve dhe Përballimit të Thatësirave bashkë me Ministrinë e Burimeve Ujore kanë planifikuar punët e mëtejshme për parandalimin e përmbytjeve dhe të shpëtimit.

Ministria e Financave dhe Ministria e Menaxhimit të Emergjencave shpërndanë rreth 15.35 milionë dollarë nga fondi qendror i shpëtimit për ndërhyrjet në terren, ndërsa afro 2 milionë dollarë dha edhe Federata Pankineze e Sindikatave.

Burimi