Pjetër Gjini “takon” të rinjtë…/ Figura e spikatur e humorit u kujtua përmes krijimtarisë së tij

Një mbrëmje dedikuar e gjitha artistit të humorit Pjetër Gjini, ishte ajo që u zhvillua nën praninë e spektaktorëve të shumtë në mjedisin e jashtëm të qendrës rinore “Arka” në Shkodër.

Një kast i gjerë artistësh u përkushtuan të sillnin bukur disa nga këngët e humorit të Pjetër Gjinit që erdhën të interpretuara nga formacioni vokal/orkestral “Arkestra” dhe këngëtari Albert Naraçi.

Pjesë e kësaj mbrëmje ishin edhe kujtimet dhe bejtat e rrëfyera nga miq të kohës si dhe aktorët Sara Smaja dhe Marsel Paplekaj. Në përfundim të kësaj nate regjisori Stefan Çapaliku dhe drejtuesi artistik Lorenc Radovani flasin për këtë figurë të spikatur të Shkodrës dhe vlerat e tij.

Për këngëtarin Albert Naraçi kjo mbrëmje rikthen në vëmendje një figurë që ishte harruar prej shumë vitesh.

Performanca “Pjetër Gjini takon të rinjtë” u organizua falë mbështetjes së Agjencisë Zvicerane për Zhvillim dhe Bashkëpunim.

Pjetër Gjini nuk ishte thjesht një humorist por njëri nga bejtexhinjtë më të shquar të Shkodrës, krijues këngësh dhe kupletesh, i pranishëm pothuajse në çdo gëzim familjar të njerëzve të këtij qyteti.