Plani i Trump për Gazën, Sekretari amerikan i Shtetit: Zhvendosja e palestinezëve, e përkohshme

Sekretari amerikan i Shtetit, Marco Rubio ka folur mbi propozimin e presidentit amerikan Donald Trump për marrjen nën kontroll të Rripit të Gazës dhe zhvendosjen e palestinezëve. Në lidhje me propozimin e fundit, Rubio u shpreh se do të jetë i përkohshëm.

“Propozimi i presidentit amerikan Donald Trump për të rivendosur popullsinë e Gazës do të ishte vetëm i përkohshëm”, tha Rubio.

Në një udhëtim në Guatemalë, Marco Rubio tha se propozimi i Trump nuk ishte armiqësor, por një lëvizje bujare, duke treguar gatishmërinë e Shteteve të Bashkuara për t’u bërë përgjegjëse për rindërtimin e asaj zone.

Ai tha se ideja ishte që banorët e Gazës të largoheshin nga territori për një periudhë “të përkohshme”, ndërsa mbeturinat të pastroheshin dhe të bëhej rindërtimi.

Zëdhënësja e Shtëpisë së Bardhë Karoline Leavitt sqaroi më tej komentet e Trump, duke thënë se SHBA nuk po planifikonte të vendoste “çizmet në tokë” në territor.

Ndërkohë, Ministri izraelit i Mbrojtjes, Israel Katz ka thënë se banorët e Gazës “duhet të lejohen të gëzojnë lirinë e daljes dhe imigrimit”, por dha pak detaje se si do të funksiononte kjo.

Sipas ligjit ndërkombëtar, përpjekjet për të transferuar me forcë popullsi nga territori i pushtuar janë rreptësisht të ndaluara.

Zëdhënësja e Shtëpisë së Bardhë Karoline Leavitt u tha gazetarëve të mërkurën se presidenti ishte i përkushtuar për të rindërtuar Gazën dhe për të zhvendosur “përkohësisht” banorët e saj gjatë procesit.

Trump tha të martën se zhvendosja do të ishte e përhershme.