Plani strategjik 2025-2030, Spiropali: Synojmë Kuvend me standardet e një vendi anëtar të BE-së
Kuvendi i Shqipërisë zhvilloi të premten një analizë pune për shqyrtimin e draftit të Planit Strategjik dhe të Veprimit të Kuvendit për periudhën 2025-2030. Në këtë takim morën pjesë, stafi drejtues i Kuvendit dhe përfaqësues të lartë të Prezencës së OSBE në Shqipëri, që po asistojnë me ekspertizë procesin.
Gjithashtu, në takim mori pjesë edhe kryeparlamentarja Elisa Spiropali, e cila theksoi faktin se qasja strategjike e Kuvendit të Shqipërisë, synon arritjen e standardeve të një parlamenti të një vendi anëtar të BE-së.
Spiropali nënvizoi faktin se objektivat strategjikë të Kuvendit do të fokusohen në: Fuqizimin e lidershipit dhe rritjes së kontributit për objektivin strategjik të anëtarësimit të Shqipërisë në BE, mbështetjen e pakursyer për reformat integruese e demokratizuese; fuqizimit të partneritetit dhe bashkëpunimit me institucionet e pavarura; modernizimin e shërbimeve parlamentare dhe rritjen e transparencës për publikun.
Nga ana tjetër, Clarisse Pasztory, zëvendësambasadore e Prezencës së OSBE në Shqipëri nënvizoi punën e mirë të bërë nga Kuvendi në rritjen e transparencës edhe ne kuadër të bashkëpunimit të mirë të deritanishëm, theksoi rëndësinë e një procesi gjithëpërfshirës konsultimi me të gjitha palët dhe grupet e interesit gjatë hartimit të planit të ri strategjik 2025-2030, si dhe konfirmoi mbështetjen edhe në të ardhmen të OSCE Presence in Albania për Kuvendin e Shqipërisë si një partner afatgjatë.
Hartimi i Planit Strategjik 2025-2030, vjen në vijim të planit të parë strategjik 2020-2025, i cili shërbeu si një dokument shumë i rëndësishëm udhërrëfyes për rritjen e transparencës ndaj publikut, besueshmërisë së institucionit, kontrollit parlamentar postlegjislativ, rritjen e rolit të Kuvendit në procesin e integrimit të vendit, etj.
Sipas Kuvendit, Plani i ri Strategjik do të mbështetet në shtatë fusha prioritare që lidhen me: rritjen e efektivitetit në ushtrimin e funksioneve ligjvënës; rritjen e llogaridhënies publike të ekzekutivit dhe institucioneve të pavarura; rritjen e efektivitetit në ushtrimin e funksionit zgjedhës; forcimin e rolit të Kuvendit në procesin e integrimit europian; forcimin e rolit të Kuvendit në diplomacinë parlamentare; rritjen e transparencës, pjesëmarrjes dhe edukimit qytetar në veprimtarinë parlamentare; përmirësimin e kuadrit rregullator, forcimin e kapaciteteve të burimeve njerëzore dhe përmirësimin e infrastrukturës fizike dhe digjitale.
Drafti i Planit të ri Strategjik do t’i nënshtrohet në vijim procesit të konsultimit me partnerë të ndryshëm, duke përfshirë median dhe grupet e interesit.
