Pragsfida Vllaznia – Dinamo city / Kuqeblutë do të vuajnë në këtë takim mungesën e mbrojtësit Melos Bajrami
Kjo është mënyra që ka zgjedhur tekniku kuqeblu Thomas Brdaric të shkojë në konferencën e pragndeshjes. Dinamo City është kundërshtari i radhës për Vllazninë dhe një rival i drejtpërdrejtë për vendin e dytë.
“Ajo që konsideroj të rëndësishme është se kemi patur kohën e mjaftueshme për t’u përgatitur për ndeshjen me Dinamon. Duhet të tregojmë potencialin që kemi si skuadër përballë këtij rivali. Duhet të mësojmë nga gabimet e bëra në të shkuarën. Jemi të vetëdijshëm për situatën ku ndodhemi dhe duam mbështetjen e tifozëve.”
Vllaznia do të vuajë në këtë përballje mungesën e mbrojtësit Melos Bajrami.
“Bajrami mungon për shkak të kartonit të kuq. Lojtarët duhet të tregohen më të vëmendshëm dhe të mos ndëshkohen me kartona të tillë që mund të na ndryshojnë planet në mes të ndeshjes. Sidoqoftë kemi lojtarë mjaft të mirë në ekip të cilëve mund t’u besojmë në këtë ballafaqim.”
Vllaznia-Dinamo City do të luhet ditën e shtunë në orën 15:30 në stadiumin “Loro Boriçi” , ndërsa çiftet e tjera të javës së 34-t të “Abissnet Superiore” janë: Elbasani-Bylis, Skënderbeu-Tirana, Teuta-Laçi dhe Partizani-Egnatia.
