Presidentët dhe kandidatët amerikanë që janë përballur me atentate

Përpara tentativës së vrasjes ndaj ish-presidentit Donald Trump, ka pasur raste të shumta të dhunës politike që synonin presidentët e SHBA, ish-presidentët dhe kandidatët presidencialë të partive kryesore.

Një vështrim në disa nga atentatet dhe tentativat për vrasje që kanë ndodhur që nga themelimi i kombit në 1776:

Abraham Lincoln në 1865

Presidenti i 16-të i Shteteve të Bashkuara të Amerikës, Abraham Lincoln, u vra nga aktori i njohur amerikan John Wilkes Booth më 14 prill 1865 ndërsa ishte duke shikuar “Our American Cousin” në Teatrin e Fordit, Uashington. Ai u qëllua në kokë, ndërsa vdiq në ditën e nesërme, më 15 prill. Lincoln u bë presidenti i parë amerikan që u vra.

James Garfield në 1881

Garfield ishte presidenti i dytë që u vra, gjashtë muaj pas marrjes së detyrës. Ai po ecte nëpër një stacion treni në Uashington më 2 korrik 1881, për të kapur një tren për në New England kur u qëllua nga Charles Guiteau. Ai nuk humbi jetën menjëherë pas të shtënave, por megjithatë nuk mundi kurrë të rikuperohej plotësisht. Ai humbi jetën më 19 shtator.

William McKinley në 1901

McKinley vdiq më 14 shtator nga gangrena e shkaktuar nga plagët. Ai ishte presidenti i tretë amerikan që u vra, pas Abraham Lincoln në 1865 dhe James A. Garfield në 1881. Leon Czolgosz, një punëtor i pakënaqur, qëlloi Presidentin McKinley me një revolver të fshehur nën një shami më 6 shtator 1901.

John F Kennedy në 1965

Më 22 nëntor 1963, John F. Kennedy , presidenti i 35-të i Shteteve të Bashkuara, u vra duke hipur në një autokolonë presidenciale nëpër Dealey Plaza në Dallas, Teksas. Kennedy ishte në automjet me gruan e tij, Jacqueline, guvernatorin e Teksasit, John Connally, dhe gruan e Connally, Nellie, kur ai u qëllua për vdekje nga ish- marinsi amerikan, Lee Harvey Oswald. Autokolona nxitoi në Spitalin Memorial Parkland, ku Kennedy u shpall i vdekur rreth 30 minuta pas të shtënave.

Kandidati presidencial Robert F Kennedy në 1968

Më 5 qershor 1968, Robert F. Kennedy u qëllua në Hotelin Ambassador në Los Anxhelos, Kaliforni, dhe u shpall i vdekur të nesërmen. Kennedy, një senator i Shteteve të Bashkuara dhe kandidat në zgjedhjet presidenciale të Partisë Demokratike të vitit 1968 , fitoi zgjedhjet paraprake në Kaliforni dhe Dakotën e Jugut më 4 qershor. Ai iu drejtua mbështetësve të fushatës së tij në sallën e Hotelit Ambasador. Pasi doli nga podiumi, ai u plagos për vdekje nga të shtënat e shumta të gjuajtura. Kennedy vdiq në Spitalin Good Samaritan gati 25 orë më vonë.

Shtatë të tjerë janë përballur me tentativa për vrasje:

Franklin D Roosevelt në 1933

Roosevelt, në atë kohë presidenti i zgjedhur, sapo kishte mbajtur një fjalim në Miami nga pjesa e pasme e një makine të hapur, kur u dëgjuan të shtëna me armë zjarri. Roosevelt nuk u plagos në të shtënat e shkurtit të vitit 1933 që vranë kryebashkiakun e Çikagos Anton Cermak.

Harry S Truman në 1950

Truman po qëndronte në Blair House, përballë Shtëpisë së Bardhë, në nëntor 1950 kur dy persona të armatosur hynë brenda. Truman nuk u plagos, por një polic i Shtëpisë së Bardhë dhe një nga sulmuesit u vranë në një shkëmbim zjarri. Dy policë të tjerë të Shtëpisë së Bardhë u plagosën. Oscar Callazo u arrestua dhe u dënua me vdekje. Në vitin 1952, Truman e ndryshoi dënimin me burgim të përjetshëm. Ai u lirua nga burgu në vitin 1979 nga Presidenti Jimmy Carter.

Gerald Ford në 1975

Ford u përball me dy tentativa për vrasje brenda javësh në vitin 1975 dhe nuk u lëndua në asnjërin incident. Në përpjekjen e parë, Ford ishte rrugës për në një takim me guvernatorin e Kalifornisë në Sacramento, kur dishepulli i Charles Manson Lynette “Squeaky” Fromme shtyu mes një turme në rrugë, nxori një pistoletë gjysmë automatike dhe e drejtoi nga Fordi. Arma nuk u shkrep. Fromme u dënua me burg dhe u lirua në vitin 2009. 17 ditë më vonë një grua, Sara Jane Moore, u përball me Fordin jashtë një hoteli në San Francisko. Moore qëlloi drejt Ford, por doli huq, ndërsa nuk arriti të qëllonte sërish pasi u kap nga krahu nga një kalimtar i rastësishëm. Moore u dërgua në burg dhe u lirua në vitin 2007.

Ronald Reagan në 1981

Reagan po linte një fjalim në Uashington dhe po shkonte drejt autokolonës së tij kur u qëllua nga John Hinckley Jr., i cili ishte në turmë. Reagan u shërua nga të shtënat e marsit 1981. Tre persona të tjerë u qëlluan, duke përfshirë sekretarin e tij të shtypit, James Brady, i cili mbeti pjesërisht i paralizuar si pasojë. Hinckley u arrestua dhe u mbyll në një spital psikiatrik pasi një juri e shpalli atë me probleme të shëndetit mendor.

George W Bush në 2005

Bush po merrte pjesë në një tubim në Tbilisi në vitin  2005 me presidentin gjeorgjian, Mikhail Saakashvili kur një granatë dore u hodh drejt tij. Të dy burrat ishin pas një pengese antiplumb kur granata, e mbështjellë me leckë, ra rreth 100 metra larg. Granata nuk shpërtheu dhe askush nuk u lëndua. Vladimir Arutyunian u dënua me burgim të përjetshëm.

Kandidati i atëhershëm Theodore Roosevelt në 1912

Ish-presidenti u qëllua në Milwaukee në vitin 1912 gjatë fushatës për t’u kthyer në Shtëpinë e Bardhë. Roosevelt kishte shërbyer më parë dy mandate si president dhe po kandidonte përsëri. Letrat e palosura dhe një kuti xhami metalike në xhepin e Roosevelt-it me sa duket ndaluan plumbin dhe ai nuk u lëndua rëndë. John Schrank u arrestua dhe e kaloi pjesën e mbetur të jetës së tij në spitalet psikiatrike.

Kandidati George Wallace në 1972

Wallace po kërkonte nominimin presidencial demokrat kur u qëllua gjatë një fushate në Maryland në 1972, një incident që e la atë të paralizuar nga beli e poshtë. Arthur Bremer u dënua për sulmin. Ai u lirua në vitin 2007./ associated press