Presidenti Bajden sulmon Tramp dhe Putin: Unë nuk do të përkulem

Presidenti Xho Bajden (Joe Biden) ka mbajtur një fjalim tejet të zjarrtë mbrëmjen e djeshme (7 mars), ndërsa sulmoi edhe paraardhësin e tij Donald Trmpin (Trump).

Bajden e nisi fjalën me konfirmimin e misionit të ri të SHBA-ve për të ofruar ndihma në Gaza. Ai konfirmoi se ushtria amerikane do të krijonte një “skelë të përkohshme në Mesdhe në bregdetin e Gazës”, e aftë për të marrë ngarkesa të mëdha me ujë, ushqim dhe ilaçe.

Bajden u zotua se misioni nuk do të përfshijë vendosjen e trupave amerikane në terren dhe do të lehtësojë një infuzion të konsiderueshëm të furnizimeve në Gaza.

Ndërsa përsëriti besimin e tij në të drejtën e Izraelit për t’u mbrojtur kundër Hamasit, Bajden dënoi krizën humanitare në Gaza, ku më shumë se 30 mijë palestinezë janë vrarë në sulmet ajrore izraelite.

“Për Izraelin, unë i them këtë: ndihma humanitare nuk mund të jetë një konsideratë dytësore ose një mjet pazari. Mbrojtja dhe shpëtimi i jetëve të pafajshëm duhet të jetë prioritet. Ndërsa shikojmë nga e ardhmja, e vetmja zgjidhje reale për situatën është një zgjidhje me dy shtete me kalimin e kohës”, tha Bajden.

Bajden iu referua në mënyrë të përsëritur Trampit me tallje ndërsa kritikoi pikëpamjet e ish-presidentit nga politika e jashtme deri te reforma e imigracionit.

Sakaq, Bajden i bëri thirrje Kongresit të miratojë më shumë fonde për Ukrainën në mes të luftës së saj kundër Rusisë dhe dënoi komentet e fundit të Tramp për NATO-n.

Bajden e krahasoi këtë moment me vitin 1941, kur SHBA-ja qëndronte në greminën e hyrjes në Luftën e Dytë Botërore dhe ai u kujtoi vazhdimisht amerikanëve se “historia po shikon” se si do të reagojë kombi ndaj krizave që po shpalosen në mbarë botën. Ndërsa reflektonte mbi dhunën vdekjeprurëse të parë në Kapitol më 6 janar, Bajden paralajmëroi se demokracia përballet me një kërcënim thelbësor.

“Jo që nga Presidenti Lincoln dhe lufta civile, liria dhe demokracia jonë nuk janë sulmuar në shtëpi siç janë sot. Ajo që e bën momentin tonë të rrallë është liria dhe demokracia janë nën sulm si brenda ashtu edhe jashtë shtetit në të njëjtën kohë”, tha Bajden.

Bajden më pas akuzoi Trumpin për “përkulje” ndaj presidentit rus, Vladimir Putin, pasi ish-presidenti tha se do të lejonte Rusinë të “bënte çfarëdo dreqin që do” ndaj vendeve të NATO-s që nuk arrijnë të japin kontribute të mjaftueshme financiare për aleancën.

“Është e rrezikshme dhe e papranueshme. Mesazhi im për Presidentin Putin, të cilin e njoh prej kohësh, është i thjeshtë. Ne nuk do të largohemi. Ne nuk do të përkulemi. Unë nuk do të përkulem”, theksoi Bajden.