Probleme me ujin e pijshëm – Banorët: Kemi bërë shpime në tokë, uji del i ndotur
Prej vitesh, qindra familje në zonën pranë Varrezave të Dëshmorëve, në periferi të Shkodrës, nuk furnizohen me ujë të pijshëm .
Një problem i tillë e ka vështirësuar shumë jetesën e tyre. E vetmja mënyrë për t’u furnizuar me ujë të pijshëm është përmes shpimeve në tokë, gjë e cila u ka kushtuar shumë.
Por, një situatë e tillë rrezikon shëndetin e tyre, pasi uji që arrijnë të sigurojnë është i pakonsumueshëm, tregojnë vetë për RTSH Shkodra.
Ky problem vijon të jetë prezent në këtë lagje prej kohësh. Pavarësisht shqetësimit të ngritur herë pas herë nga banorët deri më tani nuk është marrë asnjë masë për t’i dhënë një zgjidhje.
Kjo zonë periferike është ndër më të harruarat, edhe si nga ana e infrastrukturës rrugore dhe energjisë elektrike.
