Projekti për rikualifikimin e hyrjes së qytetit – Prej dy javësh nuk është bërë asnjë ndërhyrje nga IKMT

Prishja e objekteve në hyrje të Shkodrës, për t’i hapur rrugë projektit të ri për rikualifikimin e hyrjes së qytetit, është ndaluar prej dy javësh.

Pas shembjes së 6 ndërtimeve Inspektoriati i Mbrojtjes së Territorit ka ndaluar aksionin.

Në total, janë 11 objekte pa leje për t’u shkatërruar dhe 10 të tjera me leje, por që presin procesin e shpronësimit.

Projekti i prezantuar është shumëdimensional dhe do të transformojë krejtësisht hyrjen e Shkodrës, duke sjellë një imazh ndryshe për të gjithë turistët që do të vizitojnë qytetin verior.

Investimi synon krijimin e mjediseve sportive, pistë për biçikleta, pika panoramike mbi liqen, hapësira për aktivitete, një mol të ri që do të plotësojë rrjetin e moleve me ato të Shirokës e Zogajt, si dhe një muze të bukur për historikun e lundrimit në liqen e në lumin Buna.