Protesta/ Berisha: Më 27 dhjetor mblidhemi te Gjykata e Lartë. Betejë pa kthim, çdo të enjte para Parlamentit

Ka nisur para Kryesisë së Kuvendit protesta e demokratëve, mbështetës të ish-kryeministrit Sali Berisha.

Ky i fundit i është bashkuar protestuesve, ndërsa tubimi vjen teksa Këshilli i Mandateve është mbledhur për të shqyrtuar kërkesën e Prokurorisë së Posaçme (SPAK) që kërkon autorizimin që do t’i hapte rrugë caktimit të masës së sigurisë “arrest shtëpie” për Berishën.

Në fjalë e tij, Berisha i bëri thirrje qytetarëve që të protestojnë më 27 dhjetor para Gjykatës Kushtetuese, kur do të shqyrtohet padia e opozitës për shfuqizimin si antikushtetues të marrëveshjes Shqipëri-Itali për emigrantët. Po ashtu, Berisha bëri thirrje për protesta çdo të enjte para Parlamentit.

“Më 27 dhjetor, çdo qytetar para Gjykatës së Lartë, ku Edi Rama ka porositur ekzekutimin e identitetit tonë. Ne do qëndrojmë, do fitojmë. E enjtja që vjen, të gjithë para Parlamentit monist. Këta duken të fortë, por këta janë kalbësira të vërteta. E patë sesi në 5 javë e shndërruam Parlamentin e tyre në një ndërtesë dhe asgjë më shumë. Në 5 javë ia dolëm të imponojmë të bëhen gazi i botës dhe të votojnë buxhetin në 4 minuta. Këto janë vetëm fillimi. Ju ftoj çdo të enjte para Parlamentit për pluralizmin, për demokracinë”, tha Berisha.   

Ish-kryeministri e konsideroi protestën e sotme të ngjashme me atë për rrëzimin e diktaturës në 1997-ën. Ai iu drejtua kryeministrit Edi Rama duke e quajtur “xhelat të votës së lirë”.

 “Sot ne jemi në mision të njëjtë. Në shtator të vitit 1997, PD-në në Shqipëri dhe botë, më të shumtit e menduan se ajo përfundoi në arkivat e historisë, po ata u gabuan. Asokohe, njësoj si tani, një prokuror politik, xhelat i Sigurimit ët Shtetit, akuzoi Sali Berishën për krime kundër njerëzimit dhe Parlamenti i hoqi imunitetin. Asokohe menduan se erdhi revanshi i etërve për të shuar idealet e lirisë së shqiptarëve, por gabuan.

Ne e nisëm 30 në oborrin e selisë, u bëmë 300, 3000, 30.000 dhe 300.000 dhe u kthyem me votën e lirë në pushtet. Edhe sot ne jemi këtu për idealet e lirisë. Jemi këtu në një kthesë që na fton historia, në një betim që kërkon e sotmja dhe e ardhmja jonë. Jemi këtu për t’i komunikuar Edi Ramës se je i dënuar për jetë për shkak të votës së shqiptarëve. Edi Rama ke vite që sillesh si xhelat me votën e shqiptarëve, ke vite që për karrigen tënde nuk njeh ligj, normë e standard, duke besuar se demokratët i shtype. Edi Rama është fundi yt, mblidhu dhe struku ku të duash. Pak javë më parë të paralajmërova se ajo që po shihej në Parlament, ajo mosbindje e deputetëve të PD-së ishte vetëm fillimi. Do shohësh mosbindjen e luftëtarëve të lirisë, nuk do gjesh vrimë ku të futesh”, tha Berisha. Hapim sot kapitullin e betejës pa kthim drejt regjimit që po shkatërron ekzistencën e qenies sonë”, tha Berisha.

Berisha po hetohet në lidhje me privatizimin e ish-kompleksit “Partizani”, ndërsa akuzat ndaj tij i ka konsideruar si  “absurde”. Ai refuzoi të zbatonte vendimin e Gjykatës për t’u paraqitur para oficerëve të policisë gjyqësore pasi, sipas tij, ishte në shkelje të Kushtetutës. Sipas Berishës, masa e sigurisë ndaj tij nuk mund të vendosej pa autorizimin e Kuvendit.