Protesta e 11 korrikut – Belind Këlliçi tregon për RTSH-në skenarin e saj

Protesta e opozitës do të dominohet nga diskutime  të personave që i përkasin shoqërisë civile si edhe botës së artit. RTSH ka mësuar se deri tani është menduar që  fjalimet e vetme politike do të jenë ato të Kryetarit të Partisë Demokratike Sali Berisha, fjala e të cilit do të përcillet direkt nga banesa e tij, sikundër e Presidentit të Partisë së Lirise Ilir Meta.

Belind Këlliçi tha në një intervistë për RTSH-në se protesta do të ketë si kërkesë lirimin e liderit të opozites Sali Berisha.

“Kushdo që mund të ketë ndjesi nga më të ndryshmet për Liderin e Partisë Demokratike Sali Berisha, duhet të kuptojë se sot që flasim jemi i vetmi vend anëtar i NATO-s, i cili Kryetarin e opozitës prej 191 ditësh e ka në arrest shtëpie si masë politike, pa prova dhe fakte” tha anëtari i Kryesisë së PD-së Belind Këlliçi.

Gjithashtu opozita do të kërkojë tha ai krijimin e një qeverie teknike që do t‘i hapë rrugë zgjedhjeve të lira.

“Kryeministri Edi Rama ka futur duart në të gjitha proceset zgjedhore, ka vjedhur votat e qytetarëve shqiptarë duke tjetërsuar vullnetin tyre. Ndaj qeveria teknike dhe zgjedhjet e lira janë kërkesë e panegociueshme e opozitës ’’tha Belind Këlliçi në intervistën për RTSH-në.

Protesta tha Këlliçi do të jetë paqësore, por nuk përjashtohen aktet e mosbindjes civile.

“Demokratët përherë kanë organizuar protesta paqësore.  Akte të mosbindjes civile ka patur gjithmonë në protesta, megjithatë janë qytetarët ata që do të vendosin. Për një gjë jam i bindur, se do të ketë shumë ngjyra kjo protestë” tha Këlliçi.

Në protestë do të ketë edhe denoncime të atyre që opozita i ka quajtur mega-afera korruptive, sikundër eshte ajo e inceneratorëve  apo skandali i Spitalit të Onkologjikut.