PS bojkotoi komisionin TIMS, Salianji: Po mbrojnë grupin kriminal që ndërhyri në sistem
Kryetari i komisionit hetimor për sistemin TIMS, Ervis Salianji ka akuzuar mazhorancës se po mbron grupin kriminal që ndërhyri në sistem dhe për këtë arsye bojkotuan mbledhjen e komisionit.
Në një deklaratë për mediat, Salianji tha se është e paprecedentë që të në mazhorancë të bojkotojë komisionet parlamentare, ndërsa shtoi se këtë po e bëjnë “si skuthat dhe në mënyrë teatrale”.
“Qytetarët, Shqipëria, një parlament, u bë dëshmitare e një ngjarje të paprecedentë, ku anëtarët e Komisionit Hetimor për Timsin, pasi kërkuan 5 minuta pushim, nuk u rikthyen më në komision. Kërkesa e PS, siç e keni parë nga mbledhja në mbledhje, kanë kërkuar në mbledhjet pasardhëse, ndryshimin e mendimit që kanë pasur në mbledhjen pasardhëse. Ata arritën në një vendim absurd, ku kërkonin anulimin e atyre vendimeve që ishin marrë në mbledhjen e mëparshme, me pretendimin se kishin qenë në tualet. Është e qartë se çfarë qëllimi ka PS, për të bërë hetimin parlamentar, për të mbrojtur një grup të pretenduar kriminal, që është vendosur qëllimisht në policinë e shtetit, për të ndërhyrë në sistemin TIMS. Për këtë arsye ne duhet të ishim në kushtet e urgjencës”, tha Salianji.
Salianji tha se kërkesat për informacion do i dërgohen sot institucioneve dhe se ato e kanë detyrim ligjor të përgjigjen brenda 5 ditëve. Kreu i komisionit shtoi se vetëm në Shqipëri sovraniteti u dorëzohet bandave.
“Përfaqësuesit politikë që kanë detyrim të firmosin dhe depozitojnë kërkesat tona për informacion sa më shpejtë sot dhe institucionet kanë detyrim të përgjigjen brenda 5 ditëve siç e kërkon edhe ligji, përndryshe do përballen me pasojat ligjore dhe kallëzimet përkatëse për shpërdorim detyre. Jemi në një ndërhyrje të paprecedentë . Në asnjë vend të botës nuk ka ndodhur që sovraniteti t’i dorëzohet bandave edhe për të dhënat më sensitive që ka një republike dhe kjo nuk është vetëm për të dhënat e qytetarëve shqiptarë por edhe të huajt që hyjnë dhe dalin në vendin tonë, të dhënat policore dhe të dhëna të tjera sensitive.
Nuk duhet të kalohet pa u ndëshkuar cilido që është përfshirë në këtë veprimtari dhe të gjithë së bashku të propozojmë ndryshimet përkatëse ligjore që kjo të mos ndodh më. E padëgjuar që mazhoranca të bojkotoj komisionet, dje ikën si skuthat dhe është njësoj si është bërë ndërhyrja në sistemin TIMS. Mbrojta që u bëhet këtyre personave me mburojë politike është e paprecedentë.PS të sjellë propozimet e tyre. E patë dje që e gjithë teatri dhe kërcimi që bënë në komision, ishte një banalitete. Edhe ekspertët e mazhorancës u pyetën për propozimet që ata kishin dhe thanë nuk kemi, kush është problemi i PS? Pse nuk vijnë të bëjnë punën në komisionin?”, tha ai.
Më herët nënkryetari i komisionit TIMS, Toni Gogu tha se largimi i mazhorancës nga u bë në kushtet kur “opozita po shkel ligjet duke akuzuar dhe shpallur fajtor”, ndërkohë që e drejta e komisionit hetimor është vetëm të votojë kërkesat për informacion dhe të përcaktojë planin e hetimit.
