Publikohet videoklipi i “Zjerm”, Shkodra Elektronike tregon ekskluzivisht për RTSH detajet dhe përgatitjet për Eurovizion
Kënga “Zjerm” e grupit Shkodra Elektronike “fluturon” në Eurosong 2025.
Ende pa u mbyllur 24 orë nga publikimi i videoklipit të këngës në kanalin zyrtar të Eurovizionit në Youtube, kënga ka rrëmbyer mbi 130 mijë klikime.
Ekskluzivisht për Radio Televizionin Shqiptar dy protagonistët, Beatriçe Gjergji dhe Kolë Laca komentuan emocionet e para mbi impaktin pozitiv që kanë marrë rreth videoklipit të këngës.
“Videoklipi është mirëpritur, kemi marrë shumë mesazhe. Jemi shumë krenar për këtë sepse ata që kanë realizuar videon, janë një realitet shqiptar me shumë vlerë. Jemi shumë të lumtur që shumë njerëz po e vlerësojnë. Flaka në videoklip është reale, pas meje kam pasur një letër në flakë”, tha Beatrice.
“Është pritur mirë. Jemi shumë të gëzuar. Kemi komente pozitive. Na kanë kërkuar që këtë performancë me zjarr ta kemi dhe në Eurovizion”, tha Kolë Laca.
Protagonistet zbuluan gjithashtu detaje nga performanca e tyre në Festivalin Europian të Këngës.
“Agjencia që po merret me përgatitjen është fantastike. Di të them që ka për të qenë një përformancë e bukur dhe moderne. Koreografia nuk do të ndryshojë”, tha Gjergji.
Në kanalin zyrtar të Eurovision në YouTube pak pas publikimit të videoklipit të këngës “Zjerm” që do të përfaqësojë Shqipërinë në spektaklin europian të këngës, bie në sy numri i lartë i klikimeve të arritura brenda pak orësh nga publikimi.
Pas hedhjes së shortit final “Shkodra Elektronike” do të performojë e 12 në radhë në gjysmëfinalen e parë në Festivalin Europian të Këngës në 13 maj, ndërsa finalja e madhe do të zhvillohet në 17 maj në Bazel të Zvicrës.
