Pullat fiskale do prodhohen nga Shtypshkronja e Letrave me Vlerë, shpërndarja nis në fund të marsit
Ministria e Financave ka lajmëruar se me qëllim forcimin e kapaciteteve të autoriteteve shqiptare për prodhimin dhe kontrollin e pullave fiskale nëpërmjet shoqërive shtetërore, po punon aktualisht për krijimin e një shoqërie të re, që do të funksionojë nën administrimin e Shtypshkronjës së Letrave me Vlerë (SHLV) për procesin e prodhimit dhe shpërndarjes së pullave fiskale.
Shoqëria e re, bën me dije Ministria e Financave, do të fillojë veprimtarinë gjatë muajit mars.
Kjo shoqëri do të zbatojë teknologji moderne dhe procese të avancuara, me mbështetjen edhe të Emirateve të Bashkuara Arabe, me qëllim përmirësimin e cilësisë së shërbimeve.
Ministria sjell në vëmendje se periudha tranzitore nga përfundimi i kontratës së koncesionarit, në fund të vitit 2024 deri në fillimin e prodhimit të pullave fiskale nga shoqëria, ka parashikuar të drejtën e përdorimit të pullave të porositura deri me datë 31 mars 2025.
Sipas Ministrisë, përmirësimi i efikasitetit të sistemit të pullave fiskale do të kontribuojë në zhvillimin e mëtejshëm të proceseve tregtare që garantojnë bashkëpunimin ndërkombëtar.
