Qarkullonte me armë në Shkodër – “Shqiponjat” arrestojnë 44-vjeçarin, pistoleta dërgohet për ekspertim në laborator

Qarkullonte me armë zjarri pistoletë në  Shkodër, kapet në flagrancë dhe vihet në pranga 44-vjeçari i dyshuar. Operacioni u kodua “Square” (Sheshi) dhe i arrestuari është Isak Mema, banues në Tiranë.

Arma e sekuestruar dhe fishekët dërgohen për ekspertim në Institutin e Policisë Shkencore, për të vlerësuar nëse është përdorur në krime të tjera.

Aksioni erdhi pas informacioneve të siguruara nga inteligjenca policore për 44-vjeçarin Mema dhe ndërhyrja u bë nga shërbimet e Forcës së Posaçme “Shqiponja”, në bashkëpunim me specialistët për Hetimin e Krimeve të Komisariatit të Policisë Shkodër.“

Si rezultat i këtij operacioni, u arrestua në flagrancë shtetasi Isak Mema 44 vjeç, banues në Laknas, për veprën penale “mbajtja pa leje dhe prodhimi i armëve, armëve shpërthyese dhe i municionit”, njoftoi policia vendore. 

 Më tej,  informohet dinamika e aksionit, ku në sheshin “Isa Boletini”, shërbimet e Policisë kanë lokalizuar automjetin në të cilin qarkullonte Mema.

“Gjatë kontrollit fizik, atij i është gjetur një armë zjarri pistoletë me një krehër me 14 fishekë, e cila u sekuestrua në cilësinë e provës materiale”, sqarohet më tej.

 Materialet për dosjen dhe hetimet i kaluan prokurorisë vendore.