Qeveria e Kosovës përgatit draftstatutin për Asociacionin

Qeveria e Kosovës po përgatit draftstatutin për Asociacionin i cili do të dërgohet në Gjykatën Kushtetuese në fund të muajit maj, pavarësisht deklaratave të kryeministrit Albin Kurti i cili theksonte se nuk do e pranonte atë.

Lajmi është bërë me dije nga Ministrja e Jashtme Donika Gërvalla me anë të një postimi në rrjetin social Facebook, ku ka njoftuar letrën drejtuar presidentit të Asamblesë Parlamentare të Këshillit të Evropës, Theodoros Rousopoulos.

Ajo shprehet se kanë nisur konsultimet me përfaqësues të pjesëtarëve të komunitetit serb për të marrë në konsideratë nevojat e tyre.

“Pas letrës së zotimit të datës 23 mars 2024 të nënshkruar nga lidershipi politik i Kosovës, përkatësisht presidentja Vjosa Osmani, kryeministri Albin Kurti dhe kryeparlamentari Glauk Konjufca, po ju shkruaj për t’ju informuar për hapat konkretë që po ndërmarrim në përputhje me angazhimet tona pas votimit për anëtarësim. Që nga 17 prilli 2024, Qeveria e Kosovës ka ndërmarrë hapa konkretë dhe të prekshëm në drejtim të zbatimit të plotë të Marrëveshjes Bazë dhe aneksit të zbatimit të saj, duke përfshirë Asociacionin si një nga zotimet e pas-anëtarësimit. Në përputhje me frymën e nenit 7 në lidhje me nenin 10 të Marrëveshjes Bazë, ne tashmë kemi filluar konsultimet me përfaqësuesit e pjesëtarëve të komunitetit serb për të marrë parasysh nevojat e tyre. Në këtë drejtim, Qeveria e Kosovës po përgatit një draftstatut për Asociacionin, të inspiruar nga FES-i që do të dërgohet në Kushtetuese deri në fund të majit 2024”, thuhet në letrën e ministres Gërvalla.