Qeveria e re në Kosovë, Kurti nis bisedimet me partitë e pakicës

Ndërsa presidentja e Kosovës Vjosa Osmani shpalli një ditë më parë datën 15 prill si ditën kur do të mbahet seanca konstituuse e legjislaturës së re të Kuvendit të vendit, kryeministri në detyrë dhe kreu i Lëvizjes Vetëvendosje, ka nisur takimet me partitë politike të pakicave për krijimin e qeverisë së re të vendit. Pavarësisht faktit që Vetëvendosje doli forcë e parë në zgjedhjet e nëntë shkurtit, nuk ka arritur të marrë shumicën absolute në kuvend.

 Sipas zyrës së shtypit të kryeministrisë së Kosovës, Kurti u takua sot me zëvendëskryeministren e tretë në detyrë për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi si dhe e ministrin në detyrë për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiç. 

Pas konstituimit të Kuvendit, nis procesi për krijimin e Qeverisë dhe sipas kushtetutës, presidentja Vjosa Osmani i propozon kuvendit kandidatin për kryeministër, pas një konsultimi me partinë apo koalicionin që ka fituar shumicën, që në këtë rast është Lëvizja Vetëvendosje.

Ndërkaq, në një prononcim për mediat, presidentja Vjosa osmani,  e cilësoi tejet të rëndësishëm krijimin brenda afateve kushtuese të qeverisë së re të vendit.

Sipas rezultateve të zgjedhjeve që u certifikuan nga Komisioni Qendror i zgjedhjeve, Lëvizja Vetëvendosje ka 48 deputetë në kuvend ndërsa partitë opozitare, 52, që ndahen në 24 deputetë të PDK-së, 20 deputetë të LDK-së dhe 8 deputetë të koalicionit AAK-Nisma.