Qofte juvarllaqe nga tradita e kuzhinës himarjote

Përbërësit

(Përbërësit më poshtë janë për 4-5 persona)

• 250 gr mish i grirë
• 2 kokrra vezë
• 2-3 lugë gjelle me oriz
• 1 kokërr qepë mesatare
• 1 lugë gjelle gjalpë
• 1 lugë gjelle miell gruri
• 1 gotë qumësht
• Kripë
• Piper
• Majdanoz

Përgatitja

Mishi i grirë përzihet me orizin gjysmë të zier, të bardhat e vezëve, kripë, piper, qepë të grirë në rende dhe majdanoz të grirë.

Masa ndahet në qofte, u jepet formë e rrumbullakët  dhe vendosen të ziejnë në ujë të valuar me kripë dhe lëng limoni.

Qoftet hidhini në ujin e valuar pjesë-pjesë, pasi në të kundërt u prishet forma.

Pastaj hiqen me lugë dhe lëngu i tyre ruhet mënjanë për të përgatitur salcën.

Në një tenxhere kaurdiset mielli me gjalpë derisa të zverdhet pak. Shtohet qumështi, lëngu i qofteve, hidhet pak kripë, përzihet mirë dhe lihet që të ziejë pak.

Kur salca e përgatitur hiqet nga zjarri, pritet me të verdhat e vezëve dhe me kujdes vendosen qoftet brenda. Sipër u hidhet gjalpë i skuqur lehtë dhe majdanoz i grirë hollë.

Shërbehen të ngrohta dhe me pak lëng limoni sipër.