QUINT thirrje Kosovës: Pezulloni vendimin e Bankës Qendrore për dinarin

Ambasadorët e shteteve të QUINT-it, kanë kërkuar që Kosova të pezullojë zbatimin e rregullores së Bankës Qendrore të Kosovës, sipas së cilit monedha e vetme që lejohet për kryerjen e transaksioneve të pagesave me para “cash” është euro.

Në një deklaratë të përbashkët, Ambasadat e Francës, Gjermanisë, Italisë, Mbretërisë së Bashkuar dhe SHBA-së kërkojnë pezullimin e zbatimit të rregullores, për të mundësuar një periudhë mjaft të gjatë tranzicioni

Ata theksojnë se kjo rregullore do të ketë ndikim në veçanti në shkolla dhe spitale, pasi nuk ka asnjë proces alternativ të zbatueshëm dhe po ashtu edhe në jetën e serbëve të Kosovës të cilët marrin pagesa nga Serbia.

“Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara theksojnë se rregullorja e fundit e Bankës Qendrore të Kosovës (BKK) për operacionet me para të gatshme, e cila synon të reduktojë paratë e falsifikuara, të ruajë stabilitetin financiar, si dhe të rrisë transparenca e flukseve të parasë në Kosovë, megjithatë ngre shqetësime në lidhje me ndikimin në veçanti në komunitetet me shumicë serbe.

Ne jemi të shqetësuar për ndikimin e rregullores në veçanti në shkollat ​​dhe spitalet, për të cilat asnjë proces alternativ nuk duket i zbatueshëm për momentin. Rregullorja gjithashtu do të ketë ndikim të drejtpërdrejtë në jetën e përditshme të shumicës dërrmuese të serbëve të Kosovës që marrin pagesa/ndihma financiare nga Serbia.

Pas një shkëmbimi për këtë çështje me Kryeministrin të premten, Kuinti kërkon pezullimin e zbatimit të rregullores për të mundësuar një periudhë mjaft të gjatë tranzicioni dhe për komunikim të qartë dhe efektiv publik. Çështja duhet të diskutohet më tej në kuadër të Dialogut të Lehtësuar të BE-së”, thuhet në deklaratë.

Sipas rregullores së re të Bankës Qendrore të Kosvës, e cila hy në fuqi nga 1 shkurti, valutat joeuro mund të përdoren vetëm për t’u ruajtur në formë fizike apo në llogaritë bankare dhe me to mund të kryen pagesa ndërkombëtare dhe këto valuta po ashtu mund të përdoren për këmbim. Por, këmbimi, sipas BQK-së, mund të kryhet vetëm përmes institucioneve të licencuara nga ajo për këtë shërbim.