Rama: Durana Tech Park, një destinacion për talente dhe inovacion në Shqipëri
Durana Tech Park ka nisur zyrtarisht funksionimin me dorëzimin e certifikatave për rezidentët e tij të parë, duke shënuar një hap të rëndësishëm për zhvillimin e sipërmarrjeve dhe sektorit teknologjik në Shqipëri.
Të pranishëm ishin Kryeministri Edi Rama, Ministri i Ekonomisë, Kulturës dhe Inovacionit, Blendi Gonxhja, Ministrja e Shtetit për Sipërmarrjen dhe Klimën e Biznesit, Delina Ibrahimaj dhe Drejtorja Ekzekutive e Albanian Investment Corporation, Elira Kokona.
Kryeministri Rama u shpreh i bindur se Durana Tech Park do të shndërrohet në një qendër të fuqishme të inovacionit dhe do të kontribuojë në forcimin e sektorit të teknologjisë dhe sipërmarrjes në Shqipëri.
“Ta bëjmë Shqipërinë lider në shërbimet publike elektronike dhe sot është një fakt ashtu siç dukej utopik besimi ynë se procesin e negociatave do ta përshpejtonim me ndërhyrjen e Ai gjë që sot po ndodh, ashtu siç duket utopik dhe që të kemi AI për të zhvilluar prokurimet publike pa pjesëmarrjen e njeriut. Do ta kemi në dispozicion deri ne fund të vitit të ardhshme jemi po punojmë me Mikrosoftin por edhe me vende të tjera ku kemi pasur përfaqësues nga 16 vende që po merren me këtë produkt. Durana Tech Park merr jetë nga realiteti në letër ku qëllimi kryesor që të angazhojmë sa më shumë talente shqiptare”, u shpreh Rama.
Në fjalën e tij, Rama theksoi se krijimi i Durana Tech Park ka qenë rezultat i një analize të thelluar, ku janë shqyrtuar me kujdes praktikat më të mira nga legjislacioni evropian dhe modelet e suksesshme të vendeve të tjera.
Kryeministri theksoi gjithashtu se Durana Tech Park do të luajë një rol kyç në zhvillimin e shërbimeve publike elektronike dhe se së shpejti do të prezantohet një model i ri për përdorimin e Inteligjencës Artificiale (AI) në administratën publike.
“Durana Tech Park është destinacion i krijuar për talente shqiptare dhe të rinjtë shqiptarë duke ju hapur një perspektiv inkurajuese për të realizuar Durana Tech Park kemi bërë një analizë shumë të gjatë, kemi shqyrtuar me kujdes legjislacionin evropian, kemi parë si kanë funksionuar në vende të tjera dhe besoj se kemi krijuar një kornizë unikale duke marrë më të mirën nga të tjerët. Sot ky park çon para një revolucion digjital që do të vazhdoj, së shpejti do të prezantojmë dhe modelin tjetër të AI në shërbimet publike. Ajo që është një surprizë e bukur për në është ai që na bën përshtypje që është se ka interes në institucione publike ka interes nga universitete italiane por edhe të tjera”, u shpreh Rama.
