Rama me përfaqësuesen e TikTok: Vendosëm piketa bashkëpunimi për të siguruar rihapjen e platformës

Kryeministri Edi Rama është takuar këtë të martë (21 janar) me përfaqësuesen e platformës sociale TikTok me të cilën ka ndarë shqetësimet që çuan qeverinë për vendimin për mbylljen e përkofshme të kësaj platforme në Shqipëri.

Me anë të një postimi në rrjetin social Facebook, Rama bën me dije se së bashku me kreun e Marrëdhënieve me qeveritë dhe politikën publike të TikTok për Europën, ka vendosur piketa bashkëpunimi në javët e muajt në vijim për të siguruar rihapjen e platformës në një kohë të arsyeshme.

“Davos, Forumi Ekonomik Botëror – Me Christine Grahn, kreun e Marrëdhënieve me Qeveritë&Politikën Publike të TikTokut për Europën, shtruam shqetësimet që na çuan në vendimin e mbylljes së përkohshme të aksesit në platformë nga Shqipëria, si edhe dëgjuam rrugët e mundshme të adresimit të tyre nga ana e kompanisë. Një diskutim plotësisht i hapur dhe me frymë konstruktive, ku vendosëm disa piketa bashkëpunimi në javët e muajt në vijim, për të siguruar rihapjen e TikTokut në një kohë sa më të arsyeshme, por sigurisht me të gjitha garancitë e nevojshme, në mungesë të të cilave jemi të detyruar ta mbyllim së shpejti aksesin në platformë”, shkruan Rama.

Kujtojmë se qeveria vendosi në dhjetor të 2024-ës për mbylljen e platformës TikTok në muajin janar, si masë sigurie për frenimin e dhunës në shkolla, ndonëse ky rrjet social vijon të jetë ende i hapur.