Rama propozoi konferencë ndërkombëtare për Kosovën, Sarazin: Ide pakuptim. Dialogu, e vetmja alternativë

Përfaqësuesi special i qeverisë federale për Ballkanin Perëndimor, Manuel Sarazin ka deklaruar se Gjermania nuk e mbështet idenë e një konference rajonale ndërmjet Kosovës dhe Serbisë.

Duke komentuar propozimin e kryeministrit Edi Rama për një konferencë paqeje ku të përfshihen lojtarët kryesorë për gjetjen e një zgjidhjeje mes Prishtinës dhe Beogradit, Sarazin tha se një ide e tillë nuk ka kuptim.

LEXO EDHE: Kryeministri theksoi se nevojitet një konferencë e nivelit më të lartë e thirrur nga Franca e Gjermania me mbështetjen e BE-SHBA

“Unë nuk mendoj se ka kuptim të shpikësh diçka të re pasi e kemi një marrëveshje të mirë,”ka deklaruar Sarazin për Euroactiv.

Përfaqësuesi special i qeverisë federale për Ballkanin Perëndimor shpjegoi më tej se të dyja palët e kanë bërë shumë të qartë, të paktën me fjalët e tyre, se qëndrojnë pranë marrëveshjeve të arritura deri më tani, në veçanti Marrëveshjes së Ohrit dhe aneksit të saj të vitit 2023.

“Mendoj se është e rëndësishme që ne të përpiqemi të fillojmë zbatimin dhe të nxjerrim një bilanc pozitiv hap pas hapi në mënyrë që marrëveshja të funksionojë”, u shpreh ai.

Sarazin vuri në dukje se qeveria federale është e vendosur të mbështeste dialogun e ndërmjetësuar nga BE dhe planin franko-gjerman.

“Nuk ka alternativë tjetër përveç vazhdimit të dialogut dhe përpjekjes për të rifilluar zbatimin e marrëveshjes” tha Sarrazin, i cili u ka bërë thirrje të dyja palëve “që të angazhohen pozitivisht dhe në mënyrë konstruktive në këtë proces”.

Sarrazin shtoi se të gjithë ata që ai njeh në Kosovë, duan t’i përmbahen marrëveshjeve të Ohrit, duke përfshirë Asociacionin e Komunave Serbe.

“Përshkallëzimi nuk duhet të jetë një mjet për të shkatërruar dialogun shumë lehtë. Palët duhet të kthehen në rrugën për të cilën është rënë dakord dhe nuk do të lihen thjesht të largohen nga dialogu”, nënvizoi ai.