Real-Atletico, Simeone: Ta shijojmë

Diego Simeone është gati të përballet me një tjetër derbi të Ligës së Kampionëve. “Është një ndeshje që do ta luajmë me respekt, kundër një kundërshtari të madh – fjalët e trajnerit të Atletico Madridit në prag të ndeshjes kundër Real Madridit -. Unë e perceptoj se ata na respektojnë në të njëjtën mënyrë”.

“Nëse do të ishte një ekip nga një ligë tjetër, ne nuk do t’i preknim këto çështje, por është një derbi dhe është normale të flasim për të”.

Precedentët janë të njohur, tregojnë për dy finalet e humbura nga Colchoneros kundër Blancos (2014 dhe 2016) dhe për po aq eliminime në ndeshjen e dyfishtë (2015 dhe 2017): “Nuk kanë asnjë ndikim. Për qytetin do të jetë spektakolare. Duhet ta shijojmë. Është një moment shumë i rëndësishëm, me një kundërshtar që e respektojmë shumë”.

Skuadra e Ancelottit është edhe një nga rivalët për titullin në La Liga. “Dueli në kampionat? Do të vlerësoj gjithçka, por nuk mund të mendoj për La Ligën sepse mungojnë ende ndeshjet. Jam duke u fokusuar tek e nesërmja. Historia e Madridit në Champions League është e jashtëzakonshme. Nesër sigurisht që do të kemi një mundësi të re për të shkruar faqet e rëndësishme të këtij libri”.