Reformimi i sektorit të energjisë elektrike, KfW dhe AFD hua prej 100 milionë eurosh

Në parlamentin shqiptar Komisioni për Ekonominë dhe Financat miratoi marrëveshjet me Agjencinë Franceze Për Zhvillim (AFD) dhe KfW për financimin me 100 milionë euro të fazës së dytë të projektit “Politika për mbështetjen e reformës në sektorin energjetik në Shqipëri”.

Marrëveshjet synojnë përmirësimin e sektorit energjetik të Shqipërisë, nëpërmjet reformës që shtrihet në drejtime të shumëfishta: strukturore, operacionale dhe financiare.

Ky financim parashikohej të realizohej në dy faza. Në fazën e parë, një financim prej 150 milionë eurosh i ndarë: 100 milionë euro nga KfW -ja dhe 50 milionë euro nga AFD-ja, dhe në fazën e dytë 100 milionë euro, 50 milionë euro KfW-ja dhe 50 milionë euro AFD-ja.

Huatë e bazuara në politikat e reformës (PBL) janë një mjet në të cilin fondet nga një institucion financiar ndërkombëtar i japin hua buxhetit të shtetit shqiptar, në bazë të zbatimit të reformave specifike të politikave të renditura në këtë plan strategjik (PRE).