Renditja e FIFA-s, Shqipërisë i kushtojnë barazimet e fundit

Kualifikimi në “Gjermani 2024” nuk do të thotë shumë për llogaritë e renditjes mujore të FIFA-s, e cila pritet të “dënojë” kuqezinjtë me disa vende për shkak të dy barazimeve të koleksionuara në takimet e fundit të këtij viti kalendarik.

Kuqezinjtë e mbyllën grupin si kryesues duke rrealizuar një tjetër rezultat historik për futbollin shqiptar, por barazimet në duelet me Moldavinë dhe Ishujt Faroe i kanë kushtuar.

Duke qenë se janë skuadra me koeficient më të ulët, barazimet llogariten si rezultat negative dhe Shqipëria humbet 14.13 pikë në total që do të sjellë një rënie të dukshme në përditësimin e renditjes së FIFA-s javën tjetër.

Saktësisht, Shqipëria do të zbresë nga vendi i 59-të, në të 62-tin dhe kjo ndikon shumë në shortin për kualifikueset e Botërorit. Renditja përcakton edhe ndarjen e vazove dhe duke qenë në vendin e 30-të mes skuadrave Europiane, Shqipëria do të jetë pjesë e vazos së tretë.

Por, kjo është problem pasi në kualifikueset e Botërorit, grupet ndahen me 4 apo 5 skuadra dhe vetëm e para kualifikohet direkt. Në këtë mënyrë Shqipëria do të shortohej me 2 rivalë më të fortë në letër.