RENEA në “Swat Challenge Dubai 2025”, garojnë 121 ekipe nga 50 vende
Efektivët e Repartit elitë Speciale RENEA do marrin pjesë në kompeticionin “Swat Challenge Dubai 2025”, që do të zhvillohet nga data 1 deri më 5 shkurt 2025, në Dubai.
Me anë të një njoftimi nga Policia e Shtetit, mësohet se ekipi i forcave speciale RENEA ka mbërritur mbrëmjen e sotme në Dubai dhe është pritur nga përfaqësues të Policisë së Dubait.
Sipas të njëjtit njoftim bëhet e ditur se për këtë vit janë regjistruar për të marrë pjesë 121 ekipe të forcave speciale nga 50 shtete të ndryshme nga e gjithë bota.
Në këtë kompeticion zhvillohen gara taktike, qitje dhe ushtrime fizike midis forcave speciale elitë të përfaqësuara në këtë kompeticion.
Kjo është hera e katërt që forcat speciale RENEA përfaqësojnë Policinë e Shtetit në këtë kompeticion.
