Reshjet e borës përfshijnë gjithë qarkun e Shkodrës, rrugët Bogë – Breg Lumi, Tamarë – Vermosh të kalueshme, e bllokuar Kir –Shosh

Që pasditen e së  premtes qarku i Shkodrës është përfshirë nga temperaturat e ulëta dhe reshjet e borës të cilat me intensitet të ulët nisën edhe në qytetin ë Shkodrës paraditen e se dielës, ndërkohë që në zonat malorë  kanë vijuar thuajse pandërprerje të shoqeruara edhe me erë të fortë dhe  temperatura disa gradë nën zero.

Trashësia e borës në disa zona si në  Dukagjin, Kelmend, dhe Iballë të Pukes ka rritur deri në mbi 50 cm. Por, pavarësisht kësaj situate, nga ARRSH Shkodër bëhet e ditur se  akset rrugore Tamarë-Vermosh dhe Bogë – Theth është   arritur të mbahen hapur nga firmat e kontraktuara, të cilat po punojnë me disa mjete borëpastruese dhe po kryejnë vazhdimisht kriposjes e këtyre rrugëve për të mundësuar qarkullimin e mjeteve, të cilat këshillohet të lëvizin vetëm me goma dimërore dhe zinxhir.

Ndërsa, nga Bashkia Shkodër njoftohet se është i bllokuar  aksi  Kir – Shosh, si pasojë e shembjes së dherave edhe të reshjeve të borës.

Bllokime të rrugëve rurale njoftohet gjithashtu se ka edhe në bashkinë Fushë-Arrëz, pikërisht për rrugët që lidhin qendrën e bashkisë  me Nj.A. Iballë dhe fshatrat rreth saj deri në Fierzë.

Gjthashtu, probleme ka edhe sa i takon furnizimit me energji elektrike në disa zona të qarkut të Shkodrës.

Ndërprerje të energjisë, që në orët e para të së dieles, ka patur në njësitë administrative Shalë dhe Shosh të Bashkisë Shkodër.

Gjithashtu, në bashkinë Vau Dejës  bëhet e ditur se ka mungesë të furnizimit me energji elektrike në Nj.A. Hajmel, Vig Mnelë, Temal dhe Shllak, po kështu edhe në njësitë Qafe-Mali, Iballë dhe Blerim të bashkisë Fushë Arrëz.

Sipas drejtuesve të OSHE-së  Shkodër për rikthimin e energjisë në këto zona po punohet me disa grupe pune.