Reshjet sjellin probleme në Shkodër – Disa rrugë në periferi të pakalueshme për shkak të ujit

Reshjet e shiut të ditëve të fundit, që përfshinë territorin e bashkisë së Shkodrës, kanë krijuar problematika në disa prej rrugëve në periferi të Shkodrës.

Konkretisht, në lagjen “Mark Lula” kalimi për banorët e zonës këto ditë me ujë ka qënë i vështirë. Ata kanë vendosur blloqe betoni për të kaluar.

Banorët,  por edhe kalimtarë të rastësishëm,  tregojnë se në këtë rrugë lëvizja është pothuajse e pamundur.

Një vit e gjysëm më parë në një rrugë tjetër, e përbërë nga 30 familje, në këtë lagje përfunduan kanalizimet e ujërave të bardha dhe të zeza , një investim i Ndërmarrjes së Ujësjellës Kanalizimeve  Shkodër, që shmangu gropat septike që kishin banorët.

 Në lagjen “Mark Lula” janë një sërë rrugicash të amortizuara, të cilat presin ndërhyrje për rikonstruksion.

Disa herë banorët kanë kërkuar investime në atë zonë të populluar pas viteve 90-të.