Resursi artistik i Shkodrës / Qyteti ka fatin të kultivojë një trashëgimi të pasur shpirtërore jomateriale

Shkodra ka fatin të ketë një pasuri të madhe muzikore që fare mirë mund të ndahet në tre kategori: ajo e muzikës së kultivuar që përfaqësohet nga Prenkë Jakova, Tonin Harapi dhe figura të tjera që ka në themel shkrimin e mirëfilltë kompozicional, në grupin e dytë janë këngët qytetare që kanë një autorësi dhe në grupin e tretë ato të Ahengut ndaj secili prej këtyre grupeve ka nevojë për hapësirën dhe skenën e vet.

Mjeshtri Markelian Kapidani thotë se Shkodra ka potencialin e nevojshëm artistik për të organizuar disa festivale në profile të ndryshme të muzikës.

Festivali “Luleborë” është një shembull i mirë i një festivali që ka nisur të krijojë identitetin dhe profilin e vet shprehet Kapidani.

Në Shkodër duhet të ketë vend edhe për një festival të mirëfilltë për këngën popullore, një iniciativë e nisur pak vite më parë por e ndërprerë.

Shkodra mund të krenohet me trashëgiminë e saj të pasur shpirtërore ndaj kjo traditë e hershme e qytetit duhet ruajtur dhe pasuruar gjithnjë e më shumë.